![](https://shonitpurkhabar.com/wp-content/uploads/2024/07/CHUNDEVI-1915X192.jpg)
मौन आवाज
नदीसँगै बग्ने नदी थिएँ
गतिशील छाल – तरंग – बहाव थिएँ !
झिल्मिल ईन्द्रेणी
पुर्णिामाको जून थिएँ !
वर्षायामको घनघोर वर्षा
हुरी / बतास र / तेज आँधी थिएँ !
सपना देख्ने आँखा थिएँ
भाव बुझ्ने हृदय
र प्रेम सम्झिने मस्तिष्क थिएँ !
फुलसँगै फुल्ने कोमल फुल थिएँ
पवित्र – नरम – स्निग्ध भावना थिएँ !
बोध थिएँ
बोधहरुको बोधार्थ थिएँ
पदहिन पदार्थ थिएँ
शब्दहरुको शब्दार्थ थिएँ !
अर्थहरुको अर्थ र चेतनाहरुको चेतना थिएँ !
के मात्रै थिइनँ र म त्यतिबेला –
वेगहरुको आवेग थिएँ
आवेगहरुको वेग थिएँ !
रङ्गहरुको रङ्ग थिएँ
उन्मादहरुको उमंग थिएँ !
अबोध – चञ्चल – एउटा मानिस थिएँ !
अहिले पो उदास पहाड भएँ
अहिले पो उजाड मौसम भएँ !
– कुनैबेला म पनि एउटा प्रेमी थिएँ !
![](https://shonitpurkhabar.com/wp-content/uploads/2023/08/355154686_288911633795378_6384931729542073554_n.jpg)