नयाँ धारा जडान गर्दा जडान वापत १० हजार रुपैयाँ शुल्क लाग्ने
चन्द्रागिरि नगरपालिकाले चन्द्रागिरि एकीकृत खानेपानी तथा सरसफाइ ब्यबस्थापन नियमावली २०८० प्रकाशित गरेको छ ।
नियमावली अनुसार उपभोक्ताले अब न्यूनतम ५० रुपैयाँ मासिक महसुल तिरेर पानी उपभोग गर्न पाउने छन् । नियमावलीमा १ युनिटदेखि ८ युनिटसम्मको ५० रुपैयाँ, ९ देखि १५ युनिटसम्मको थप २० रुपैयाँ र १६ देखि २५ युनिटसम्मको थप ३० रुपैयाँ, २६ देखि ३५ युनिटसम्मको थप ५० रुपैयाँ र ३६ युनिटभन्दा माथि खानेपानी खपतवापत प्रतियुनिट थप ८० रुपैयाँ निर्धारण गरेको छ ।
नयाँ धारा जडान गर्दा जडान वापत १० हजार रुपैयाँ शुल्क लाग्नेछ भने धारा नामसारी गर्दा ५ हजार रुपैयाँ लाग्ने नियमावलीमा उल्लेख गरिएको छ । औद्योगिक तथा संस्थागत धारा जडानमा भने २५ हजार जडान शुल्क लाग्नेछ । नियमावलीमा ८ परिच्छेद र १२ अनुसूची समावेश गरिएको छ । मुहानको व्यवस्थापन, समिति तथा उपसमिति गठन, कर्मचारी व्यवस्थापन, खानेपानीको महशुल सम्बन्धी व्यवस्था, मापदण्ड तथा गुणस्तर व्यवस्थापन, निजी मुहान तथा निजी व्यवसायको व्यवस्थापन र कोषको सञ्चालन र खर्च सम्बन्धी व्यवस्था परिच्छेदमा उल्लेख गरिएको छ ।
