थानकोट । चन्द्रागिरि नगरको सबैभन्दा ठूलो खेल उत्सव नैकाप गोल्डकप फुटबल प्रतियोगिताको छैठाैं संस्करण अन्तर्गत आज मंगलबारबाट दोश्रो चरणका खेलहरू सुरु हुँदैछन् ।
प्रतियोगिताअन्तर्गत आज २ खेल हुनेछन् । आज हुने खेलका विजेता टोलीहरू अन्तिम ८ का लागि छनोट हुनेछन् ।
दिनको पहिलो खेलमा आज चन्द्रागिरि नगरपालिका-५ आकाश टोलको क्लिन भिजन यूनिटीले भक्तपुरको मध्यपुर जागरुक युवा क्लबको सामना गर्नेछ । यो खेल दिउँसो १ बजे नैकापस्थित फुटबल मैदानमा सुरु हुने तालिका रहेको छ ।
पहिलो चरणमा क्लिन भिजनले साबिकको च्याम्पियन तारकेश्वर युथमाथि सनसनी पूर्ण जित हात पारेको थियो भने मध्यपुरले पहिलोपटक नैकाप गोल्डकपमा सहभागिता जनाएको विभागीय क्लब त्रिभुवन आर्मीको चुनाैती पन्छाएको थियो ।
क्लीन भिजन र मध्यपुरबीचको खेलको विजेताले कार्तिक १७ गते हुने क्वाटर फाइनल खेलमा भोलि हुने वाणस्थली युथ सोसाइटी र बार्सा नेपालबीचको खेलको विजेतासँग प्रतिस्पर्धा गर्नेछ ।
यसैगरी, आज नै हुने दोश्रो चरणको दोश्रो खेलमा कुर्दन फुटबल एकेडेमीले विजयपुर युथ क्लबको दिउँसो ३ बजे सामना गर्नेछ ।
कुर्दन पहिलो चरणमा गुणकेशरीमाथि जित हात पार्दै दोश्रो चरणका लागि छनोट भएको थियो भने विजयपुरले पहिलो चरणमा नेपालय कलेजलाई पराजित गरेको थियो ।
कुर्दन र विजयपुरबीचको खेलको विजेताले क्वाटरफाइनलमा ब्लुबेल फुटबल क्लबको कार्तिक १७ गते सामना गर्नेछ ।
ब्लुबेल भने सिधै तेस्रो चरणका लागि चयन भएको हो ।
प्रतियोगिताको विजेताले उपाधिसहित नगद ५ लाख हात पार्नेछ भने उपविजेताले २ लाख ५० हजार प्राप्त गर्नेछ । त्यस्तै सेमिफाइनलमा पराजित हुने दुई टोलीहरुलाई नगद ५०–५० हजार प्रदान गरिने पनि आयोजकले जानकारी दियो ।
प्रतियोगिताकै सर्वोत्कृष्ट खेलाडी र अन्य व्यक्तिगत विधातर्फ उत्कृष्ट हुने खेलाडीहरुलाई पनि जनही १५–१५ हजार नगद र ट्रफी प्रदान गरिनेछ । त्यसैगरी समापन कै अवसर पारी आयोजकले ५० हजार पुरस्कार राशी रहेको चन्द्रागिरि स्पोर्टस अवार्ड प्रदान गरिने पनि जनाएको छ ।
