रारा
रारा तिम्रो वक्षस्थलमा
स्नेहको न्यानो छाल भेटें
ड्यौडाको सौम्य चालमा
आमाको ममता भेंटें ।
विज्ञापन
सौन्दर्यको नीलो जलमा
प्रेमको छल्छल् स्पर्श भेंटें
हरिया पर्वत शृंखलामा
सद्भावका आँचल भेंटें ।
छायानाथको पोल्टामा
मधूर गीतसंगीत भेंटें
रारा तिम्रो स्वच्छ नभमा
अलौकिक आनन्द भेटें ।
उच्चस्थलको आंगनमा
मार्सीको सुगन्ध भेटें ।
जाँगरिला हातहरूमा
श्रमका बिम्बहरू भेटें ।
उतुंगका भीरपहरामा
कष्टसाध्य जीवन भेटें
सल्लाका सर्सराहटमा
कर्णालीकै निस्वास भेटें ।
मन्द पवन प्रवाहमा
सन्तोषी जीवन भेटें
रारा तिम्रो मुस्कानमा
जीवन दर्शन नै भेटें ।
दुख सुखको गुजुल्टोमा
मिठो आत्मज्ञान नै भेटें
रारा तिम्रो मातृत्वमा
अनुपम मुस्कान भेटें ।
