काठमाडौँ : नेकपा (माओवादी केन्द्र)का अध्यक्ष पुष्पकमल दाहाल प्रचण्डले एमाले र काङ्ग्रेसलाई भेडाको संज्ञा दिँदै माओवादी पनि त्यस्तै भइसकेको बताएका छन् ।
वाइसिएल थाहा नगरपालिका मकवानपुरको दोस्रो नगर अधिवेशनलाई सम्बोधन गर्ने क्रममा प्रचण्डले पुराना संसदीय पार्टीहरूको संगतले माओवादी पनि बिग्रिएको बताएका हुन् ।
‘भेडाको संगत गर्दागर्दै हामी पनि अलिअलि भेडाजस्तो भइयो। कांग्रेस र एमालेसँग अलि बढी संगत गरियो। यो संगत गर्ने जात होइन रहेछ। उनीहरू अर्कै जातका मान्छे हामी अर्कै जात।’ प्रचण्डले भने, ‘कुजातसँगको संसर्गले हामीलाई पनि रोग सार्यो। हामी पनि धेरथोर मैलामैला जस्ता बिग्रिएका जस्ता, जनताले हेर्दा पनि उस्तै उस्तै भन्दा लाज लाग्न थालेको छ । तर , नेपालमा गणतन्त्र सम्भव नै छैन भन्ने पार्टी र हजारौंको बलिदानी गर्नेको तुलना ढिलो , चाँडो जनताले अवश्य गर्ने बताए ।
उनले प्रधानमन्त्री केपी शर्मा ओलीले माओवादी नेतृत्वको सरकारले गरेका कामलाई समेत आफ्नो सय दिने उपलब्धिमा लाज नमानी समावेश गरेको जिकिर गरे ।
सामाजिक , राजनीतिक संरचना बढल्नेगरी माओवादीले नयाँ समाजवादी व्यवस्था निर्माणमा धेरै राम्रो काम गर्दा पनि जनस्तरमा स्थापित गर्न नसक्नु बिडम्बना भएको बताए ।
मकवानपुर थाहा नगर वाइसीएलको दोस्रो अधिवेशनको उट्घाटन गर्न प्रचण्ड ऐतिहासिक चन्द्रागिरि मार्ग चित्लाङ्ग हुँदै कार्यक्रम स्थल पुगेका थिए ।
चित्लाङ्गका स्थानिय र पार्टी पदाधिकारीहरूले उनको भव्य स्वागत गरेका थिए । सो क्रममा उनले गणेशमान सिंह राजमार्गको स्तरोन्नतिको विषयमा आफुले पहल गर्ने समेत बताएका थिए ।
