काठमाडौँ – महिला टोलीले खो खो विश्वकपको फाइनलमा पुगेर इतिहास रचेको केही घन्टामै नेपाली पुरुष टिमले पनि फाइनलमा स्थान बनाएको छ। कुनै पनि विश्वकपको फाइनलमा पुगेको नेपालको यो ऐतिहासिक अवसर हो।
शनिबार भएको पुरुषतर्फको विश्वकप सेमिफाइनलमा नेपालले इरानलाई हरायो। दिल्लीस्थित इन्दिरा गान्धी रंगशालामा भएको खेलमा नेपालले इरानलाई ७२–२० ले हराएर इतिहास रचेको हो।
यसअघि शुक्रबार भएको क्वार्टरफाइनलमा बंगलादेशलाई ६७–१८ ले हराउँदै नेपाल सेमिफाइनलमा प्रवेश गरेको थियो। त्यसअघि नेपाल समूह उपविजेता बन्दै क्वार्टरफाइनलमा पुगेको थियो। समूह ‘ए’ मा नेपालले ४ खेलबाट ६ अंक जोडेर अघिल्लो चरणमा स्थान बनाएको थियो।
समूहमा नेपाल भारतसँग ४१–३७ ले पराजित भए पनि त्यसपछि नेपालले ब्राजिललाई १३४–८ र पेरुलाई ८०–३४ ले हराउन सफल हुँदा अन्तिम खेलमा भुटानलाई ९८–८ ले हराउन सफल भएको थियो।
यसअघि आजै भएको खेलमा नेपाली महिला खो खो टोलीले पनि फाइनलमा स्थान बनाएको थियो। फाइनल प्रवेश गर्ने क्रममा नेपाली महिला टोलीले युगान्डालाई पराजित गर्दै नेपालले एतिहासिक रुपमा फाइनलमा स्थान बनाएको थियो।
नयाँ दिल्लीस्थित इन्दिरा गान्धी इन्डोर हलमा भएको खेलमा नेपालले युगान्डालाई ८९–१८ ले हराउन सफल भएको थियो।
