काठमाडौं । कीर्तिपुर नगरपालिका र युनिक युनाइटेड कीर्तिपुरको संयुक्त आयोजनामा स्वर्गीय राजकुमार नकर्मीको सम्मानमा प्रथम ‘राजकुमार नकर्मी स्मृति फुटसल प्रतियोगिता’ आयोजना हुने भएको छ। प्रतियोगिता आगामी फागुन ९ र १० गते कीर्तिपुर-३, खासीबजारस्थित इलाईट फुटसल मैदानमा सञ्चालन गरिनेछ।
प्रतियोगितामा भाग लिन इच्छुक टिमहरूका लागि दर्ता प्रक्रिया खुला गरिएको छ। आयोजकका अनुसार प्रत्येक टिमले सहभागी हुनका लागि रु ८,००० टिमदर्ता शुल्क बुझाउनुपर्नेछ। प्रतियोगिताले खेल क्षेत्रको प्रवर्द्धन गर्नुका साथै कीर्तिपुरका खेलाडीहरूलाई आफ्नो प्रतिभा प्रदर्शन गर्ने अवसर प्रदान गर्ने विश्वास आयोजक पक्षले व्यक्त गरेको छ।
यस प्रतियोगितालाई सफल बनाउन स्थानीय समुदाय, खेलप्रेमीहरू तथा सम्बन्धित निकायहरूको सहकार्य महत्वपूर्ण हुने आयोजकहरूको भनाइ छ। साथै, प्रतियोगिता खेलकुदमैत्री वातावरण निर्माण गर्दै स्व. राजकुमार नकर्मीको योगदानलाई सम्मान गर्ने उद्देश्यले आयोजना गरिएको जनाइएको छ।
