काठमाडौं । उद्योग, वाणिज्य, भूमि तथा प्रशासन मन्त्री विन्दु श्रेष्ठले उद्योगी, व्यवसायीमैत्री वातावरण बनाउन आफु मातहतका कार्यालयलाई निर्देशन दिएकी छिन् ।
उद्योग, वाणिज्य चितवन कार्यालयको अनुगमन गर्ने क्रममा प्रदेश भरिका मन्त्रालय अन्तर्गतका कार्यालयहरू छिटै प्रविधिमैत्री हुने र अब उप्रान्त घरमै बसेर व्यवसाय दर्ता र नविकरण गर्न सकिने गरि मन्त्रालयले काम गरिरहेको समेत जानकारी दिइन् ।
चितवनका विभिन्न पूर्वाधार संरचनाहरूको अनुगमनको क्रममा मन्त्री श्रेष्ठले मन्त्रालयबाट विनियोजित बजेटबाट निर्माण भएका कतिपय संरचना सम्पन भएर पनि सुचारु हुन नसक्दा जनताको अपेक्षा अनुसार कार्य हुन नसकेको तथा परिणाममुखी हुन नसकेकोप्रति चिन्ता व्यक्त गर्दै तत्काल आवश्यक कार्यविधि बनाएर ती भौतिक संरचनाहरू सञ्चालन गरिने बताइन् ।
अनुगमनका क्रममा मन्त्री श्रेष्ठले उद्योग, वाणिज्य मन्त्रालयबाट निर्मित राप्ती उद्योग वाणिज्य संघको भवन लगायत अन्य पूर्वाधारहरूको बारेमा जानकारी समेत लिएकी थिइन् ।
सो क्रममा उद्योग, वाणिज्य कार्यालय चितवनका प्रमुख विनोद पौडेलले कार्यालयको गत आर्थिक वर्षको कार्य प्रगति तथा चालु आर्थिक वर्षको कार्य योजना प्रस्तुत गरेका थिए ।
