काठमाडौँ । जेन्जी मुभमेन्ट नेपालले देशमा स्थायित्व र सुशासनका लागि निर्णायक संघर्ष सुरु गर्ने घोषणा गरेको छ ।
काठमाडौँको कीर्तिपुरमा सम्पन्न आकस्मिक भेलाले विद्रोहका प्रमुख मुद्दाहरूलाई अपहरण गरिएको र युवा पुस्ताको बलिदानलाई राजनीतिक स्वार्थमा रूपान्तरण गरिएको आरोप लगाउँदै आन्दोलनको नयाँ चरण सुरु गर्ने निर्णय गरेको हो ।
जेन-जी मुभमेन्ट नेपालले प्रधानमन्त्री सुशीला कार्की नेतृत्वमाथि तीव्र आलोचना गर्दै बलिदानको नाममा सत्ता कब्जा गरेको तथा आन्दोलनका सहिदहरूप्रति विश्वासघात गरेको र कार्की नेतृत्वको सरकार सत्ता “कू”को उपज रहेको दाबी गर्दै त्यसले विद्रोहका उपलब्धिलाई मोलमोलाइ गर्न खोजेको आरोप लगाएको छ ।
जेन-जी मुभमेन्ट भेलाले दुई प्रमुख मागहरू, प्रत्यक्ष कार्यकारी प्रणाली र संस्थागत पुनरसंरचना पूर्ण नभएसम्म संघर्ष जारी राख्ने घोषणा गरेको छ । साथै, मुभमेन्टले अबको आन्दोलनलाई शान्तिपूर्ण तर निर्णायक बनाउने प्रतिबद्धता जनाएको छ।
जेन-जी भेलाले आगामी संघर्ष र आन्दोलनका कार्य योजनासहित निकट भविष्यमै देशव्यापी अभियान सुरु गर्ने तयारी गरेको छ । भेलाले काठमाडौँमा कार्तिक २३ मा जेन्जी सभा गर्ने समेत निर्णय गरेको छ ।
