काठमाडौं । नेपाल विद्यालय खेलकुद महासंघ (NSSF) र NSSF किन्डर ओलम्पिक कमिटिको संयुक्त आयोजनामा १३ औं किन्डर ओलम्पिक पुस १२ र १५ गते त्रिपुरेश्वरस्थित दशरथ रंगशालामा हुने भएको छ ।
उक्त खेल प्रतियोगितामा नेपालय इन्टरनेसनल, प्याब्सन, एनप्याब्सन, अपेन, एनएमए र इसीइटीएलगायतका संस्थाहरु, प्रि–स्कूलमा अध्ययनरत विभिन्न उमेर समूहका बालबालिका गरी करिब ५ हजारको सहभागिता रहने आयोजक संस्था मध्येका मोहन कार्कीले जानकारी दिएका छन् ।
सो कार्यक्रमका लागि आधिकारिक टेलिभिजन लाइभ पार्टनरको रुपमा काष्ठमण्डप टेलिभिजन गोल्डसँग महासंघको केन्द्रीय कार्यालयमा महासचिव राजकुमार कार्की र काष्ठमण्डप टेलिभिजन गोल्डका मार्केटिङ्ग डाइरेक्टर रोहित भट्ट बिच सम्झौता–पत्रमा हस्ताक्षर समेत सम्पन्न भएको छ ।
उक्त कार्यक्रमको प्राविधिक तयारीका लागि NSSF Kinder Olympic Committee को मंगलबार बैठकबाट १३ औं किन्डर ओलम्पिक कार्यक्रम व्यवस्थित रूपले सञ्चालन गर्न, कार्यविभाजन गरी विभिन्न उपसमितिहरू गठन गरिएको छ भने विद्यालय टिम दर्ताका लागि यहि मंसिर २२ गतेसम्मलाई खुल्ला गरिएको र आवश्यक संख्या पूरा भए पश्चात थप आवेदन नलिने आयोजकले बताएको छ ।
