काठमाडाैं । चन्द्रागिरिमा छैटाैं राष्ट्रपति रनिङ्ग शिल्ड भोलिदेखि सुरु हुँदैछ । चन्द्रागिरि नगरपालिका शिक्षा, युवा तथा खेलकुद शाखाको आयोजनामा भोलिदेखि तीन दिनसम्म सञ्चालन हुन लागेको हो ।
प्रतियोगितामा ४७ विद्यालयका २ हजार ७२ जना विद्यार्थीले सहभागिता जनाउँदै छन् ।
प्रतियोगितामा नगरक्षेत्रका १९ सामुदायिक, २५ संस्थागत विद्यालय तथा ३ वटा क्याम्पसका ११४८ जना छात्र र ९२४ जना छात्राले मार्सल आर्टस्, भलिबल, ट्य्राक एण्ड फिल्ड (एथ्लेटिक्स), कबड्डी खेल खेलका १७ वटा स्पर्धामा भाग लिने चन्द्रागिरि नगरका मेयर घनश्याम गिरीले बिहीबार आयोजित पत्रकार सम्मेलनमा जानकारी दिए । मेयर गिरीका अनुसार प्रतिस्पर्धीहरुले ५४ स्वर्ण ५४ रजत र ८० कास्य पदकका लागि प्रतिस्पर्धा हुँदैछ ।
प्रतियोगिताको उद्घाटन चन्द्रागिरि नगरपालिका नैकापस्थित नैकाप फुटबल मैदानमा भोलि मंसिर १९ गते शुक्रबार बिहान १०ः३० बजे हुनेछ ।
प्रतियोगिता मंसिर २४ गते सम्पन्न हुने तालिका रहेको छ ।
विजेता विद्यार्थीहरूलाई प्रमाणपत्र तथा पदक प्रदान प्रतियोगिताको विधागत विजयी विद्यालयलाई कप तथा सबै विधामा हासिल गरेको नतिजाका आधारमा सर्वोत्कृष्ठ विद्यालयलाई रनिङ्ग शिल्ड, कप र दोश्रो तथा तेस्रो सर्वोत्कृष्ठ विद्यालयलाई कप प्रदान गरिने प्रतियोगिताका लागि २५ लाख रूपैयाँ विनियोजन गरिएको छ ।
