चन्द्रागिरि । हेटौंडाको बालजागृती इङ्लिस सेकेण्डरी स्कुलको आयोजनामा हेटौंडामा ११ औं राष्ट्रिय स्क्राबल प्रतियोगिता सुरु हुँदैछ । प्रतियोगिता भोलिदेखि बालजागृति बोडिङमा सञ्चालन हुनेछ ।
२ दिनसम्मको प्रतियोगितामा देशका विभिन्न जिल्लाबाट करिव १ सय जना प्रतियोगीहरु सहभागी जनाउँदैछन् । दुई दिनसम्म चल्ने उक्त प्रतियोगितामा १३ लाख रुपैयाँ खर्च हुने अनुमान आयोजकले गरेको छ ।
प्रतियोगितामा प्रथम हुनेलाई १५ हजार, सिल्ड र प्रमाणपत्र प्रदान गरिने छ भने द्धितीय हुनेलाई १३ हजार र तृतीय हुनेलाई ११ हजार सिल्ड र प्रमाणपत्र दिइने छ ।
साथै चौथो, पाँचौं, छैटौं र सातौंलाई क्रमशः ९, ७, ५ र ३ हजार नगद पुरस्कार प्रदान गरिने छ भने आठौं, नवौं, दशौं हुनेलार्इ ३, ३ हजार नगद पुरस्कार दिइने छ । त्यस्तै एघारौंदेखि पच्चीसौं हुनेलार्इ २ हजार नगद पुरस्कार प्रदान गरिने आयोजकले जनाइएको छ ।
शुक्रबार र शनिबार दुईदिनसम्म चल्ने प्रतियोगितामा मकवानपुर, चितवन, काठमाडौँ, भक्तपुर, गोरखा, स्याङ्जा, रुपन्देहि, गुल्मी, सुर्खेत, सुनसरी, बारा, अर्घखाँची, कैलालीलगायतका २५ बढी जिल्लाहरुबाट गरी १ सय भन्दा बढी विद्यार्थीले सहभागिता जनाउने भएका छन् ।
