काठमाडाैं । नेपाल ट्रक यातायात व्यवसायी महासंघको आठौं महाधिवेशनबाट चन्द्रागिरि निवासी राजेन्द्र विक्रम बानियाँ केन्द्रिय अध्यक्षमा निर्वाचित भएका छन् ।
पौष २७ गते सम्पन्न महासंघको सत्रौँ वार्षिक साधारणसभा तथा आठौँ महाधिवेशनबाट राजेन्द्र विक्रम बानियाँले १ सय १२ मतसहित प्रतिस्पर्धी ओमकृष्ण कार्कीलाई भारी मतले पराजित गर्दै ३ वर्षे कार्यकालका लागि निर्वाचित भएका हुन् । अध्यक्ष प्रत्यासी कार्कीले ७७ मत प्राप्त गरेका थिए ।
महासंघको वरिष्ठ उपाध्यक्षमा विष्णुप्रसाद न्यौपाने निर्विरोध निर्वाचित भएका छन् भने उपाध्यक्ष पदका लागि भएको निर्वाचनमा किसान गुरुङ र विद्यापति उपाध्याय घिमिरे विजयी भएका छन् ।
त्यस्तै,महासचिवमा बद्रीप्रसाद चौलागाईं निर्विरोध चयन भएका छन् भने उपमहासचिव पदमा मेघराज सिग्देल निर्वाचित भएका छन् । साथै सचिव पदमा उमेशचन्द्र मजगैयाँ र गंगाबहादुर खड्काले समान मत प्राप्त गरेपछि दुवैले आधा-आधा समय अवधिको कार्यालय सञ्चालन गर्ने सहमति गरेका छन् ।
साथै, महाधिवेशन मार्फत कोषाध्यक्षमा रुमाखर गौतम, सह–कोषाध्यक्षमा सुमन सापकोटा निर्वाचित भएका छन् ।
कुशल व्यवस्थापकीय गुण तथा नेतृत्व क्षमता भएका र लामो समय यातायात क्षेत्रमा कृयाशील बानियाँलाई अध्यक्षमा निर्वाचित गरेको आठौं महाधिवेशनले ७ वटै प्रदेशमा संयोजकसहित १६ सदस्यीय केन्द्रीय कार्यसमिति चयन गरेको छ।
नेपाल ट्रक व्यवसायी महासंघमा निर्वाचित राजेन्द्र बानियाँ नेपाली काङ्ग्रेस चन्द्रागिरि नगर पार्टी समितिको कार्यवाहक सभापतिसमेत हुन् ।
