काठमाडाैं । ११ औं राष्ट्रिय स्क्र्याबल च्याम्पियसिपमा लिटिल फ्लावर स्कुल चितवनका अर्नव पाण्डे प्रथम भएका छन् ।
प्रतियोगितामा सहभागी ८९ जनालाई पछाडि पारेर प्रथम भएसँगै अर्नवले १५ हजार नगदसहित ट्रफी, मेडल तथा प्रमाणपत्र प्राप्त गरेका छन् ।
हेटौंडा-२ स्थित बालजागृति इङ्लिस माध्यमिक विद्यालयमा सम्पन्न भएको प्रतियोगितामा नवलपरासीको सुनवल युनाइटेड स्कुलकी विनिता बर्मा द्वितीय र नवलपरासीकै विश्वज्योति सेकेण्डरी स्कूलका कृष्ण बास्तोला तृतीय भएका छन् । बर्मा र बास्तोलाले क्रमशः १३ हजार र ११ हजार रुपैयाँ नगदसहित ट्रफी, मेडल र प्रमाणपत्र प्राप्त गरेका छन् ।
प्रतियोगितामा बाराको सिमरा शुभारम्भ स्कूलका पर्वत केसीले चौथो हुँदै ९ हजार, सिमरा पब्लिक स्कूल बाराका प्रिन्स यादवले पाँचौ हुँदै ७ हजार रुपैयाँसहित ट्रफी, मेडल तथा प्रमाणपत्र प्राप्त गरेका छन् । प्रतियोगितामा शीर्ष २५ जनालाई नगदसहित पुरस्कृत गरिएको छ ।
कार्यक्रममा छैंटौं स्थान हासिल गर्नेलाई ५ हजार, सातौंदेखि दशौं स्थान प्राप्त गर्नेलाई जनही ३ हजार रुपैयाँ र एघारौंदेखि पच्चीसौं स्थान प्राप्त गर्नेलाई जनही २ हजार रुपैैयाँसहित ट्रफी, मेडल र प्रमाणपत्र प्रदान गरिएको छ । सो प्रतियोगितामा चन्द्रागिरि नगरपालिकाबाट प्रतिनिधित्व गरेको ब्राइट फ्युचर स्कुलले १६ औं स्थान प्राप्त गरेको छ ।
प्रतियोगितामा सहभागी ९० जनामध्ये मकवानपुरबाट ९ जना सहभागी भएको आयोजकले जनाएको छ । बंशगोपाल मावि, जनप्रिय मावि, सुनगाभा अंग्रेजी मावि, युनाइटेड अंग्रेजी माविबाट १,१ जना र बालजागृति माविबाट ५ जना प्रतियोगितामा सहभागी भएको आयोजकले जनाएको छ ।
प्रतियोगितामा उत्कृष्ट २५ जनाले अन्तर्राष्ट्रिय प्रतियोगितामा सहभागी हुन पाउने भएकाले विजयी सहित २५ जनालाई पुरस्कार रकमको व्यवस्था गरिएको आयोजकले जनाएको छ ।
चन्द्रागिरिको ब्राइट फ्युचर स्कुलका आयाम सापकोटा १६औं स्थान हासिल गर्न सफल भएको छ । उनले ट्रफी, मेडल, प्रमाणपत्र र २ हजार नगर पुरस्कार प्राप्त गरेका छन् ।
कोठेपदजस्तै शब्दखेलको रुपमा परिचित रहेको यो खेल अमेरिकी इन्जिनियर अल्फ्रेड मोसेर बट्सले सन १९३८ मा लेक्सिको नामले विकास गरेका थिए । हाल स्क्र्याबल भनेर चिनिने यो खेल विश्वका १ सय २० देशमा २० भन्दा बढी भाषाहरुमा खेलिने गरिएको छ ।
नेपालमा स्क्र्याबल खेल प्रतियोगिताको रुपमा सन् २०१२ फेबु्रअरी २५ र २६ मा सम्पन्न भएको थियो । देशका विभिन्न ३० जिल्लामा स्क्र्याबल क्लबको जिल्ला संयोजकसहित सक्रिय रहेको छ ।
