काठमाडौं । नेपाल आयल निगमले पेट्रोलियम पदार्थको मूल्य वृद्धि गरेको छ ।
निगमका अनुसार पेट्रोलमा प्रतिलिटर १५ रुपैयाँ तथा डिजल र मट्टितेलमा प्रतिलिटर १० रुपैयाँका दरले मूल्य बढाइएको हो ।
बढेको मूल्य आज राति १२ बजेदेखि लागू हुने निगमले जनाएको छ ।
निगमका अनुसार तेस्रो वर्ग अन्तर्गत पर्ने काठमाडौं, पोखरा र दिपायलमा पेट्रोलको मूल्य प्रतिलिटर १७२ रुपैयाँ कायम गरिएको छ भने डिजल र मट्टितेलको मूल्य प्रतिलिटर १५२ रुपैयाँ पुगेको छ ।
दोस्रो वर्ग अन्तर्गत पर्ने दाङ र सुर्खेतमा पेट्रोलको मूल्य १७१ रुपैयाँ र डिजल–मट्टितेलको मूल्य १५१ रुपैयाँ कायम गरिएको छ ।
त्यस्तै, पहिलो वर्ग अन्तर्गत पर्ने चारआली, विराटनगर, जनकपुर, अमलेखगञ्ज, भलवारी, नेपालगञ्ज, धनगढी र वीरगञ्जमा पेट्रोलको मूल्य प्रतिलिटर १६९ रुपैयाँ ५० पैसा र डिजल–मट्टितेलको मूल्य प्रतिलिटर १४९ रुपैयाँ ५० पैसा निर्धारण गरिएको छ ।
