काठमाडाैं । ऐतिहासिक एवं सांस्कृतिक नगरी मध्यपुर थिमि नगरपालिकालाई आन्तरिक तथा बाह्य पर्यटकको प्रमुख केन्द्र बनाउने उद्देश्यले शनिबारदेखि ‘गन्तव्य मध्यपुर’ अभियानको शुभारम्भ गरिएको छ।
बिस्का जात्रा र नयाँ वर्ष २०८३ को पूर्वसन्ध्यामा आयोजित एक विशेष समारोहका बीच बागमती प्रदेशका संस्कृति तथा पर्यटन मन्त्री सुरेश श्रेष्ठले सो अभियानको उद्घाटन गरेका हुन् ।
अभियानकै अवसर पारेर नगरपालिकाले शङ्खधर चोकमा स्थानीय उत्पादन तथा हस्तकला प्रवर्द्धन एवं बिक्री केन्द्र सञ्चालनमा ल्याएको छ।
यसैगरी, ऐतिहासिक ‘निगु पुखु’ (दुई पोखरी) परिसरमा खुल्ला धिमे बाजा प्रतियोगिताको आयोजना गरिएको छ। मौलिक संस्कृति जोगाउने उद्देश्यले आयोजित उक्त प्रतियोगितामा भक्तपुर, काठमाडौँ, ललितपुर, कीर्तिपुर र काभ्रेपलाञ्चोकका गरी कूल ३७ वटा धिमे समूहले प्रतिस्पर्धा गरिरहेका छन्।
‘गन्तव्य मध्यपुर’ अभियानअन्तर्गत नयाँ वर्षभरि विभिन्न सांस्कृतिक, आर्थिक र पर्यटकीय गतिविधिहरू सञ्चालन गरिने नगरपालिकाले जनाएको छ।
