सोलुखुम्बु, कात्तिक १७। सोलुखुम्बुको खुम्बु पासाङल्हामु गाउँपालिका–४ स्थित फेरेचे हेलिप्याडमा अवतरणका क्रममा दुई हेलिकोप्टर आपसमा ठोक्किएका छन्।
मंगलबार बिहान फेरेचे हेलिप्याडमा फिस्टल एयर र एयर डाइनेष्टीका हेलिकोप्टर अवतरण गर्ने क्रममा ठोक्किएका हुन्।
जिल्ला प्रहरी कार्यालय सोलुखुम्बुका डीएसपी नवीनराज बुढाथोकीका अनुसार सगरमाथा क्षेत्रको खुम्बु उपत्यकामा पर्ने फेरेचे हेलिप्याडमा दुई हेलिकोप्टर ठोक्किएका हुन्।
फेरेचे सगरमाथा क्षेत्रको महत्वपूर्ण पर्यटकीय बस्ती हो। सगरमाथा आधार शिविर, खुम्बु क्षेत्रका विभिन्न गन्तव्य तथा उद्धार उडानका लागि हेलिकोप्टरको नियमित आवागमन हुने क्षेत्रमा फेरेचे पनि पर्छ।
घटनामा फिस्टल एयर र एयर डाइनेष्टीका हेलिकोप्टर संलग्न रहेका छन्। दुर्घटना अवतरणका क्रममा भएको हो।
घटनापछि दुर्घटनाको कारण, हेलिकोप्टरमा सवार यात्रु तथा चालक दलको अवस्था र भएको क्षतिसम्बन्धी विवरण संकलन तथा अनुसन्धान भईरहेको जनाइएको छ ।
