काठमाडौं । दोस्रो चन्द्रागिरि महिला ब्याडमिन्टन प्रतियोगिता २०८२ सम्पन्न भएको छ ।
चन्द्रागिरि महिला ब्याडमिन्टन क्लबको आयोजनामा महांकाल ब्याडमिन्टन कभर्ड हलमा माघ २३ र २४ गते दुई दिनसम्म सञ्चालन भएको उक्त प्रतियोगिताको समापन कार्यक्रममा प्रमुख अतिथि चन्द्रागिरि नगर उपप्रमुख बसन्ती श्रेष्ठ, विशेष अतिथि चन्द्रागिरि नगरपालिका वडा नम्बर ८ का वडाध्यक्ष प्रह्लाद रिजाल, चन्द्रागिरि नगरपालिका वडा नम्बर ६ का वडा सदस्य लक्ष्मी थापा, महांकाल सामुदायिक वन उपभोक्ता समितिका अध्यक्ष निराजन महत, चन्द्रागिरि ब्याडमिन्टन क्लबका अध्यक्ष राजकुमार पोखरेल लगायतको उपस्थिति रहेको थियो ।
३ ओटा विधा अन्तर्गत खेलाइएको उक्त प्रतियोगितामा महिला डबल्स (टप १० बाहेक) प्रतियोगितामा नविना राई र निसंम हांमा सुब्बा प्रथम हुन सफल भएका छन् भने शर्मिला केसी र सरुसा मगर दोस्रो तथा शोभा गुरुङ, अविना गुरुङ, अस्मिता खत्री र अनुपमा क्षेत्री तेस्रो भएका थिए ।
त्यस्तै, छात्र तर्फ स्टीभ खत्री प्रथम, शोभव विष्ट दोस्रो र साजन तामाङ र साग्रिन गोपाली तेस्रो भएका थिए भने छात्रा तर्फ सुजाता मगर प्रथम, एलिना मगर दोस्रो तथा लाक्पाडोल्पा र दिक्षिता लामिछाने तेस्रो भएका थिए ।
महिला डबल्समा प्रथम हुनेलाई १५ हजार, दोस्रो हुनेलाई १० हजार र तेस्रो हुनेलाई २५,२५ सय, तक्मा, ट्रफी र प्रमाण पत्र दिइएको थियो । त्यस्तै, छात्र र छात्रा (सिंगल)तर्फ प्रथम हुनेलाई ५ हजार, दोस्रो हुनेलाई ३ हजार र तेस्रो हुने दुई टिमलाई १, १ हजार, मेडल, ट्रफी र प्रमाणपत्र दिइएको थियो ।
दोस्रो चन्द्रागिरि महिला ब्याडमिन्टन प्रतियोगिताको समापन तथा पुरस्कार वितरण कार्यक्रमलाई सम्बोधन गर्दै प्रमुख अतिथि, नगर उप-प्रमुख बसन्ती श्रेष्ठले खेलकुद क्षेत्रमा महिलाहरूको सहभागिता एवम् क्रियाशीलताले महत्वपूर्ण र विशेष अर्थ राख्ने भन्दै आयोजक संस्थालाई धन्यवाद दिएकी थिइन् ।
