काठमाडौं । नेपाल संवत् ११४७ को अवसरमा नागार्जुनमा आयोजित नगरस्तरीय भिन्तुना तथा सांस्कृतिक कार्यक्रमले नेवाः सभ्यता, मौलिक संस्कृति र पहिचान संरक्षणको सन्देश दिएको छ।
नेवाः देय् दबू जामाःच्व नगर समितिको आयोजनामा गत कात्तिक २४ गते नागार्जुन नगरपालिका–५ स्थित हरसिद्धि मन्दिर प्राङ्गण, सीतापाइलामा ‘भिन्तुना कालबिल नापं सांस्कृतिक ज्याझ्वः’ अर्थात् शुभकामना आदानप्रदान तथा सांस्कृतिक कार्यक्रम आयोजना गरिएको थियो।
नगरभित्रका विभिन्न गुठी, समूह तथा संस्कृतिप्रेमीहरूको सहभागितामा मोटरसाइकल, साइकल र पैदल र्याली निकालिएको थियो। नगरका विभिन्न स्थानबाट सुरु भएका र्यालीहरू हरसिद्धि मन्दिर प्राङ्गणमा पुगेर सभामा परिणत भएका थिए। गत वर्षदेखि नगरस्तरीय रूपमा आयोजना हुँदै आएको भिन्तुना कार्यक्रमले यस वर्ष पनि उल्लेख्य जनसहभागिता जुटाएको आयोजकले जनाएको छ।
कार्यक्रममा ऊर्जा, जलस्रोत तथा सिँचाइमन्त्री विराजभक्त श्रेष्ठ विशेष अतिथि तथा वरिष्ठ कलाकार मदनकृष्ण श्रेष्ठ प्रमुख अतिथिका रूपमा सहभागी भएका थिए। बागमती प्रदेशसभा सदस्यहरू, नागार्जुन नगरपालिकाका कार्यवाहक प्रमुख सुशीला अधिकारी, नगर प्रवक्ता महेश रिमाल, विभिन्न वडाका अध्यक्षहरू तथा नेवाः देय् दबू केन्द्रीय समितिका महासचिव श्रीकृष्ण महर्जनलगायतको उपस्थिति थियो।
नेवाः सभ्यता संरक्षणमा पुर्याएको योगदानको कदर गर्दै प्रमुख अतिथि मदनकृष्ण श्रेष्ठलाई सम्मान गरिएको थियो। त्यसैगरी नगर प्रवक्ता महेश रिमाल, वडा नं. २ का अध्यक्ष थुमबहादुर केसी र वडा नं. ३ का अध्यक्ष उमेश लामालाई सम्मानपत्र प्रदान गरिएको थियो।
कार्यक्रममा नेवाः देय् दबू केन्द्रीय समितिका महासचिव श्रीकृष्ण महर्जनले स्थानीय तहमा नेपाल संवत्को प्रयोग र कार्यान्वयनको अवस्थाबारे अध्ययन गरी प्रतिवेदन तयार गर्न नगर समितिलाई आग्रह गरेका थिए। उनले नागार्जुन नगरपालिकाको नाम रञ्जना लिपिमा लेखेर स्थानीय मौलिक पहिचानलाई संस्थागत गर्न पनि नगरपालिकाको ध्यानाकर्षण गराएका थिए।
नगर समितिका वरिष्ठ उपाध्यक्ष विश्वराम बलामीले स्वागत मन्तव्य राखेको कार्यक्रममा प्रमुख अतिथि मदनकृष्ण श्रेष्ठले शुभकामना मन्तव्य दिएका थिए। समितिका अध्यक्ष अजित पुतुवारले धन्यवाद मन्तव्यसहित कार्यक्रम समापन गरेका थिए।
नेपाल संवत्को प्रवर्द्धन, नेवाः भाषा, कला, संस्कृति र सभ्यताको संरक्षणसँगै नयाँ पुस्तामा मौलिक पहिचानप्रतिको चेतना अभिवृद्धि गर्ने उद्देश्यले आयोजित कार्यक्रमले सांस्कृतिक एकता र सामुदायिक सहभागिताको महत्वलाई पुनः उजागर गरेको छ।
