काठमाडाैं । माघ २ गते सम्पन्न चित्लाङ गोल्डकप नाइन ए साइड फुटबलको उपाधि चन्द्रागिरि नगरपालिकाको कुर्दन फुटबल एकेडेमीले जितेको छ ।
थाहा नगरपालिकाको वडा नं ९ चित्लाङमा पौष २७ गतेदेखि सञ्चालन भएको प्रथम “चित्लाङ गोल्डकप नाइन ए साइड” फुटबल प्रतियोगिताको उपाधि चन्द्रागिरि नगरपालिकाको कुर्दन फुटबल एकेडेमी” जितेको छ ।
खेलकुद मार्फत चित्लाङको पर्यटन प्रवर्द्धन गर्ने उद्देश्यले चित्लाङ खेलकुद विकास समितिको आयोजना तथा थाहा नगरपालिका वडा नं ९ को सहकार्यमा आयोजना गरिएको चित्लाङ गोल्डकपको फाइनल खेलमा कुर्दन फुटबल एकेडेमीले डाँडाबास फुटबल क्लबलाई १-० गोल अन्तरले पराजित गर्दै उपाधि जित्न सफल भएको हो ।
फाइनल खेलमा कुर्दन एकेडेमीका जर्सी नम्बर १६ का आयुष्मान श्रेष्ठले निर्णायक गोल गर्दै टोलीलाई विजय दिलाएका थिए । उपाधिसँगै विजेता कुर्दन फुटबल एकेडेमीले नगद एक लाख रुपैयाँ, ट्रफी, मेडल तथा प्रमाणपत्र प्राप्त गरेको छ भने उपविजेता डाँडाबास फुटबल क्लबले नगद ५० हजार रुपैयाँ सहित ट्रफी, मेडल र प्रमाणपत्र प्राप्त गरेको छ ।
प्रतियोगितामा कुर्दन फुटबल एकेडेमीका रोहित थापा उत्कृष्ट खेलाडी घोषित भएका थिए भने अंकित खड्गी उत्कृष्ट गोलरक्षक बन्न सफल भएका छन् । त्यस्तै, शिखर क्लबका विवेक थोकर र कुर्दन एकेडेमीका सन्देश श्रेष्ठ संयुक्त रूपमा उत्कृष्ट गोलकर्ता घोषित भएका छन् ।
विजेता, उपविजेता तथा विभिन्न विधामा उत्कृष्ट खेलाडीहरूलाई प्रमुख अतिथि थाहा नगरपालिकाका नगर उपप्रमुख भरत गोपालीद्वारा पुरस्कार तथा प्रमाणपत्र वितरण गरिएको थियो ।
चित्लाङ खेलकुद विकास समितिका अध्यक्ष अमर सिंह ठकुरीको अध्यक्षतामा सम्पन्न पुरस्कार वितरण तथा समापन कार्यक्रममा थाहा नगरपालिका वडा नं ९ का वडाध्यक्ष राजकुमार बलामी, वडा नं ७ का अध्यक्ष शिवराज थिङ, निर्माण व्यवसायी जयराम लामिछाने, जनप्रतिनिधि, खेलप्रेमी तथा स्थानीयबासीहरूको उल्लेख्य उपस्थिति रहेको थियो ।
