काठमाडाैं । आन्तरिक पर्यटन प्रवर्द्धनको उद्देश्यका साथ चन्द्रागिरि विकास मञ्चले दोस्रो हाईकिङ्ग कार्यक्रम आयोजना गर्ने भएको छ ।
चन्द्रागिरि नगरपालिका अन्तर्गत रहेको धार्मिक, साँस्कृतिक एवम् प्राकृतिक सम्पदाहरूको अध्ययन, अनुसन्धान तथा आन्तरिक पर्यटन प्रवर्द्धन गर्न चन्द्रागिरि नगरपालिका वडा नं ७ को पाटीधारा-महांकाल भैरवको मन्दिर हुँदै राम लक्ष्मणले घुँडा धसेकाे ठाउँ, भालेश्वर मन्दिर, चन्द्रागिरिको भान्ज्याङ्ग,पानीघाट हुँदै पाटीधारासम्म पदयात्रा (हाईकिङ्ग) गरिन लागेको चन्द्रागिरि विकास मञ्चकी उपाध्यक्ष निर्मला महतले जानकारी दिइकि छिन् ।
चन्द्रागिरि ७ मा रहेको महांकाल भैरव मन्दिर, राम लक्ष्मणले घुँडा धसेको ठाउँ, भालेश्वर मन्दिरको बारेमा जानकारी मूलक धार्मिक, सांस्कृतिक र ऐतिहासिक ठाउँहरुको अवलोकन गर्न आयोजना गरिएको हाईकिङ्ग कार्यक्रममा सम्पूर्ण चन्द्रागिरि नगरवासीलाई कार्यक्रममा सहभागी हुन मञ्चका अध्यक्ष प्रेम महर्जनले अनुरोध समेत गरेका छन् ।
२०८२ साल चैत २८ गते शनिबार बिहान ७ बजेदेखि चन्द्रागिरि नगरपालिका वडा नं ७ स्थित ब्राइट एन्जेल्स स्कुलसँगैको पाटीधाराबाट सुरु हुने उक्त हाइकिङ्ग कार्यक्रममा सहभागीहरुलाई बिहानको नास्ता, दिउँसोको खानाको साथै टि-सर्टको पनि व्यवस्था गरिएको समितिको कोषाध्यक्ष सानु श्रेष्ठले जानकारी दिएका छन् ।
कार्यक्रम २०८२ साल चैत २८ गते शनिबार बिहान ७ बजेदेखि चन्द्रागिरि नगरपालिका वडा नं ७ स्थित ब्राइट एन्जेल्स स्कुलसँगैको पाटीधाराबाट सुरु हुने जनाइएको छ ।
२०७० सालमै गठन भएको र २०७४ सालमा आधिकारिक रूपमा दर्ता गरिएको चन्द्रागिरि विकास मञ्चका संस्थापक अध्यक्ष राजु श्रेष्ठ हुन भने हालका अध्यक्षमा प्रेम महर्जन रहेका छन् । यस संंस्थाले २०७५ सालमा पहिलो हाईकिङ्ग चन्द्रागिरि १४ स्थित फुटबल ग्राउण्डदेखि ईन्द्रदह. कालुपाण्डेको समाधी हुँदै मसिनेसम्म आयोजना गरेको थियो ।
