काठमाडाैं । स्थानीय तहका प्रशासकीय अधिकृत तथा अन्य कर्मचारीहरू कार्यालय समयमा हाजिर भइ कार्य नगरेको पाइए कार्वाहीको दायरामा आउने भएका छन् ।
नेपाल सरकार सङ्घीय मामिला तथा सामान्य प्रशासन मन्त्रालयले एक सूचना जारी गर्दै स्थानीय तहमा प्रमुख प्रशासकीय अधिकृतको नियमित उपस्थिति नभएको तथा कामकाजका लागि खटाइएका कर्मचारीहरू समयमै कार्यालयमा हाजिर नभएका कारण सेवा प्रवाहमा गम्भीर असर परेको साथै त्यस विषयमा व्यापक जन गुनासाहरू आइरहेको सन्दर्भमा स्थानीय सरकार सञ्चालन ऐन, २०७४ को दफा ८४ (४) बमोजिम स्थानीय तहमा प्रमुख प्रशासकीय अधिकृतको रूपमा कामकाज गर्न खटाइएका कर्मचारीहरू कार्यालयमा नियमित उपस्थित भई कामकाज नगरे उनिहरू उपर सख्त कार्वाही गरिने जनाएको हो ।
त्यस्तै, हाजिर भई नसकेका कर्मचारीहरूलाई यथाशीघ्र सम्बन्धित स्थानीय तहमा हाजिर हुन तथा निर्णय बमोजिम रमाना भई नगएमा र स्थानीय तहको सेवा प्रवाह प्रभावित भएमा प्रचलित कानुन बमोजिम कार्वाही गरिने समेत मन्त्रालयले जनाएको छ ।
