काठमाडौं । चन्द्रागिरि नगरपालिका र नेपाल सशस्त्र अस्पताल,बलम्बु बीच स्वास्थ्य सेवा सम्बन्धि विभिन्न विषयमा सम्झौता भएको छ ।
वैशाख २८ गते भएको स्वास्थ्य सेवा सम्झौता पत्रमा चन्द्रागिरि नगरपालिकाको तर्फबाट प्रमुख प्रशासकीय अधिकृत जग्दिश चन्द्र नेपाली र सशस्त्र अस्पतालको तर्फबाट अस्पतालका प्रतिनिधिले हस्ताक्षर गरेका थिए ।
सम्झौतामा चन्द्रागिरि नगरपालिका र लायन्स क्लब चन्द्रागिरिको लगानीमा खरिद गरिएका ७ थान अत्याधुनिक डायलाईसिस मेसिन नेपाल एपीएफ अस्पताललाई उपलब्ध गराउने लगायतका विषय उल्लेख गरिएको छ । सशस्त्र प्रहरी अस्पताललाई उपलब्ध गराउने भनिएका ति डाइलाईसिस मेसिनहरू प्राथमिक अस्पताल थानकोटमा २०८२ असार २८ गतेदेखि थन्किरहेका थिए ।
नेपाल एपीएफ अस्पतालमा २०८० वैशाख २७ गतेदेखि डायलाईसिस सेवा शुरु भएको थियो । नेपाल सरकारले जनस्वास्थ्य प्रति चासो राख्दै डायलाईसिस र मृगौला प्रत्यारोपणमा सहयोग उपलब्ध गराउने निर्णय भएपछि शुरु भएको डायलाईसिस सेवामा थप ७ मेसिनले नेपाल एपीएफ अस्पतालको विस्तार र विविधिकरणमा महत्वपुर्ण टेवा पुग्ने विश्वास लिईएको छ ।
सम्पन्न सम्झौता अनुसार नेपाल एपीएफ अस्पतालमा चन्द्रागिरि युनिट स्थापना गर्ने तथा चन्द्रागिरि नगरबासीको स्वास्थ्य उपचार प्राथमिकतामा राख्न उक्त युनिट प्रयोग गरे बापत हुने आर्थिक व्ययभारमा चन्द्रागिरि नगरपालिकाको लगानी सहयोग रहने बताइएको छ ।
आगामी ५ वर्षका लागि गरिएको सम्झौतामा चन्द्रागिरि नगरबासीको स्वास्थ्य सेवा र सहज उपचार सेवाका अन्य बिषयमा समेत सहमति भएको जनाइएको छ ।
