काठमाडाैं । संघीय साम्सद जगदीश खरेलको राजधानी दैनिक पत्रिका बन्द गर्ने अभिव्यक्तिलाई लिएर नेपाल पत्रकार महासंघले आपत्ति जनाएको छ ।
पत्रकार महासंघले वैशाख ३० गते प्रेस विज्ञप्ति मार्फत सत्ताधारी दल राष्ट्रिय स्वतन्त्र पार्टीका प्रतिनिधि सभा सदस्य जगदीश खरेलले प्रकाशित समाचारलाई लिएर राजधानी दैनिक पत्रिका बन्द गर्न धम्की दिएकोप्रति ध्यानाकर्षण भएको जनाएको हो ।
यहि वैशाख २८ गते संसद् बैठकमा बोल्दै खरेलले संवैधानिक हकको ख्यालै नगरी पत्रिका बन्द गर्न धम्की दिनुलाई महासंघले असंवैधानिकमात्र होइन, निन्दनीय र विधायकलाई पटक्कै नसुहाउने व्यवहारका रुपमा लिएको भन्दै सत्ताको आडमा विधायकले समाचारको विषयलाई लिएर फौजदारी मुद्दा बनाइ प्रहरीको साइवर व्यूरोमा उजुरी गर्नु पनि आपत्तिजनक कार्य भएको जनाएको छ ।
महासंघले समाचार सामग्रीप्रति असहमति भए प्रेस काउन्सिल नेपालमार्फत समाधान खोज्न र भविष्यमा प्रेस स्वतन्त्रताविरोधी हर्कत नदोहोर्याउन समेत ध्यानाकर्षण गरेको हो ।
त्यस्तै, बीमापोष्ट डटकममा प्रकाशित समाचार हटाउन काठमाडौं जिल्ला अदालतबाट अन्तरिम आदेश जारी भएको विषयप्रति पनि महासंघले ध्यानाकर्षण भएको बताएको छ ।
२०८२ चैत्र २४ र २६ गते सिएनआइका पूर्वअध्यक्ष विष्णु अग्रवालबाट भ्याट र भन्सार छली भएको भनी बीमापोष्ट अनलाइनमा प्रकाशित समाचार हटाउन सम्पादकका नाममा अन्तरिम आदेश जारी गरिएको सन्दर्भमा प्रचलित विधि छलेर समाचार हटाउन विपक्षीको सुनुवाई नै नगरी एकतर्फी आदेश आउनु चिन्ताको विषय भएको उल्लेख गर्दै अदालतको आदेशमा पुनर्विचार गर्न र प्रेसको संवैधानिक अधिकारको संरक्षण गर्न नेपाल पत्रकार महासंघले ध्यानाकर्षण गराएको हो ।
