काठमाडाैं । ऊर्जा, जलस्रोत तथा सिँचाइ मन्त्रालयले चैत्र १७ गतेदेखि प्लास्टिकजन्य सामग्रीको प्रयोगमा पूर्ण रूपमा प्रतिबन्ध लगाएको विषयमा “नेपाल बायो ब्याग उत्पादक संघ”ले स्वागत गरेको छ ।
वातावरण मैत्री बायो ब्याग उत्पादन गर्दै आएको नेपालका बायो ब्याग उद्यमीहरूको छाता संगठन “नेपाल बायो ब्याग उत्पादक संघ”ले नेपाल सरकारको उर्जा मन्त्रालयले वातावरण संरक्षण, स्वच्छता प्रवर्द्धनको उद्देश्यलाई व्यवहारमा उतार्नेगरि गरेको प्लास्टिक प्रतिबन्धको निर्णयलाई “ऐतिहासिक कदम” भन्दै स्वागत गरेको हो ।
प्लास्टिकजन्य वस्तुको अत्यधिक प्रयोगले हाल विश्वको वातावरणमा भयावह असर पारिरहेको अवस्थामा वैकल्पिक वातावरणमैत्री सामग्रीलाई प्रोत्साहन गर्ने नीतिलाई आत्मसात गर्दै सरकारले गरेको निर्णयले पर्यावरण संरक्षण तथा मानव स्वास्थ्यको क्षेत्रमा दीर्घकालीन महत्व राख्ने नेपाल बायो ब्याग उत्पादक संघका पदाधिकारी तथा चन्द्रागिरिमा उपत्यकाकै पहिलो बायो ब्याग उत्पादन गरिरहेका ईजि ब्यागका सञ्चालक प्रशन्न गोपालीले बताएका छन् ।
उर्जा मन्त्रालयले गरेको प्लास्टिकजन्य सामाग्री माथिको प्रतिबन्ध कार्यान्वयनमा जटिलता देखिएपनि यसको प्रभावकारी कार्यान्वयनका लागि सबैको सहकार्य आवश्यक रहेको वातावरणविद्हरूले जनाएका छन् ।
