काठमाडौँ । राष्ट्रिय स्वतन्त्र पार्टी (रास्वपा) चन्द्रागिरि नगर कमिटीको पहिलो नगर अधिवेशन आइतबार सतुंगलस्थित एक पार्टी प्यालेसमा भव्य रूपमा सुरु भएको छ। केन्द्रीय सदस्य विश्व श्रेष्ठको प्रमुख आतिथ्यता तथा स्थानीय नेता-कार्यकर्ताहरूको बाक्लो उपस्थितिमा अधिवेशनको उद्घाटन सत्र सम्पन्न भएको हो।
उद्घाटन सत्रलाई सम्बोधन गर्दै काठमाडौं क्षेत्र नम्बर १० का सांसद प्रदीप विष्ट, समानुपातिक सांसद भूमिका श्रेष्ठ र क्षेत्रीय सभापति रामराजा थापाले पार्टीको विगत र वर्तमानको समीक्षा गर्नुभयो। स्थापनाकालमा थोरै संख्यामा रहेका कार्यकर्ता र घर-घर पुगेर सदस्य थप्नुपर्ने बाध्यताका कारण आफूहरूलाई ‘ढलान टोली’ को उपमा दिने गरिएको स्मरण गर्दै नेताहरूले अहिले चन्द्रागिरिमा ओइरिएको जनसागरले उत्साही बनाएको बताए। नेताहरूको साझा मत थियो— “हामीले चुनावमा मत त जित्यौँ, तर संगठन बलियो बनाउन अब प्रत्येक नागरिकको मन जित्न आवश्यक छ।”
उद्घाटन सत्र सकिएलगत्तै अधिवेशन बन्द सत्र र नेतृत्व चयनको प्रक्रियामा प्रवेश गरेको छ। सर्वसम्मत रूपमा नेतृत्व टुंग्याउने नेताहरूको कसरत असफल भएपछि अन्ततः लोकतान्त्रिक विधि (निर्वाचन) मार्फत कार्यसमिति छान्न लागिएको छ।
जसअनुसार नेतृत्वका लागि निवर्तमान अध्यक्ष जनार्दन केसी र निवर्तमान सचिव मधुकर बस्नेत प्यानलसहित चुनावी मैदानमा उत्रिएका छन्। उपसभापति पदमा करुणा श्रेष्ठ निर्विरोध निर्वाचित भइसकेकी छन् भने सचिव, सहसचिव र ११ जना नगर सदस्यका लागि तीव्र प्रतिस्पर्धा भइरहेको छ।
अधिवेशनले कुल १५ सदस्यीय नयाँ नगर कार्यसमिति चयन गर्नेछ।
