काठमाडौं । राष्ट्रिय स्वतन्त्र पार्टी (रास्वपा) चन्द्रागिरि नगर समितिको प्रथम नगर अधिवेशन सम्पन्न भएको छ। अधिवेशनबाट जनार्दन केसी १५२ मतसहित सभापतिमा निर्वाचित भएका छन्।
आज सम्पन्न निर्वाचनमा कुल २०६ मत खसेकोमा केसीले १५२ मत प्राप्त गर्दै विजयी हासिल गरेका हुन्। उनका निकटतम प्रतिस्पर्धी मधुकर बस्नेतले ५४ मत प्राप्त गरेका थिए।
अधिवेशनअघि दुवै पक्षबीच सभापति पदका लागि तीव्र प्रतिस्पर्धा देखिएको थियो। कार्यकर्ता भेटघाट, आन्तरिक छलफल तथा सामाजिक सञ्जालमा बढेको सक्रियताले चन्द्रागिरिको राजनीतिक माहोल निकै तातेको थियो।
यसैगरी, उपसभापति पदमा करुणा श्रेष्ठ निर्विरोध निर्वाचित भएकी छन् भने अधिवेशनबाट १५ सदस्यीय नयाँ नगर समिति समेत चयन गरिएको छ।
कार्यसमितिमा महिला तथा समावेशी प्रतिनिधित्वलाई समेत प्राथमिकता दिइएको बताइएको छ।
नवनिर्वाचित सभापति केसी यसअघि पनि रास्वपा चन्द्रागिरिको नगर सभापतिको जिम्मेवारीमा रहेका थिए भने उनका प्रतिस्पर्धी मधुकर बस्नेत सचिव पदको जिम्मेवारीमा थिए ।
