काठमाडौं । चन्द्रागिरिका सम्भवत: प्रथम सगरमाथा आरोहि युवा विधान श्रेष्ठलाई चन्द्रागिरिका बासिन्दाले नगर परिक्रमा गराइ भव्य स्वागत तथा सम्मान गरेका छन् ।
चन्द्रागिरिका प्रथम सगरमाथा आरोही मेकानिकल इन्जिनियर विधान श्रेष्ठलाई आज उनको आफ्नो जन्मथलोमा स्वागत गर्दै स्थानीय बासिन्दाहरूले नगर परिक्रमासहित सम्मान गरेका हुन् ।
चन्द्रागिरी नगरपालिका वडा नं ९ निवासी विधानले मे १९ तारिखका दिन बिहान ९ बजेर २२ मिनेटमा सगरमाथाको चुचुरोमा पाईला टेकेका हुन । न्युयोर्कदेखि सगरमाथा शिखरसम्म केवल ३ दिन २३ घण्टा ७ मिनेटमा श्रेष्ठले सगरमाथाको यात्रा पुरा गरेका हुन । यो संगै उनी छोटो समयमै सगरमाथा आरोहण गर्ने आरोहीको रूपमा विश्व रेकर्ड कायम गर्ने व्यक्तिका रूपमा सामेल भएका छन ।
श्रेष्ठले विश्वको सर्वोच्च शिखर सगरमाथा सफल आरोहण गरि चन्द्रागिरिको नाम राख्न सफल भएको शुभ अवसरमा उनको सम्मानमा चन्द्रागिरिका बासिन्दाले बाजागाजा सहित विष्णुदेवी मन्दिरबाट नगर परिक्रमा गराई स्वागत तथा सम्मान गरेका हुन ।
श्रेष्ठलाई स्वागत एवं सम्मान गर्न चन्द्रागिरि नगरपालिकाकी उपमेयर वसन्ती श्रेष्ठ लगायत विभिन्न वडाका वडा अध्यक्षहरू तथा स्थानिय बासिन्दाहरूको अभूतपूर्व सहभागीता रहेको थियो ।
त्यस्तै, आज नै नेपाल सांस्कृतिक कला मन्दिरले श्रेष्ठलाई मच्छेगाउँमा सम्मान गर्दैछ भने चन्द्रागिरि नगरपालिकाले पनि सगरमाथा आरोही विधान श्रेष्ठलाई सम्मान गर्ने घोषणा गरेको छ ।
