काठमाडाैं । आसन्न फागुन २१ गते हुने निर्वाचनमा मतदान केन्द्र र सुरक्षा अनुगमन घुम्ती टोलीमा खटिने कर्मचारीले दैनिक भत्ता २५ सय सम्म पाउने भएको छ ।
निर्वाचन आयोगले सार्वजनिक गरेको मतदान केन्द्र र सुरक्षा अनुगमन टोलीमा खटिने कर्मचारीको दैनिक भत्ता, मतदान केन्द्र निर्माण, मतपेटिका ढुवानी लगायतका खर्च विवरण अनुसार मतदान केन्द्रतर्फ मतदान अधिकृतले दैनिक २५ सय, सहायक मतदान अधिकृतले २ हजार प्रतिदिन (सहायक मतदान अधिकृत, अधिकृत स्तरको कर्मचारी भएमा दैनिक भत्ता तथा भ्रमण खर्च मतदान अधिकृत सरह पाउने छन् ।
त्यस्तै, सहायक कर्मचारीले १ हजार ६ सय, सहयोगी कर्मचारीले १ हजार २ सय र स्वयंसेवकले पनि प्रतिदिन १ हजार २ सय रुपैयाँ भत्ता पाउने छन् ।
साथै, मतदान केन्द्र निर्माण खर्चतर्फ भवन उपलब्ध भएको स्थानमा ७ हजार र भवन उपलब्ध नभएको स्थानमा १५ हजार रुपैयाँ खर्चको व्यवस्था गरिएको छ ।
त्यस्तै, मतपेटिका तथा निर्माण सामाग्री दुवानी खर्चतर्फ प्रति २० किलोमिटर ३ हजार र विविध तथा भैपरी आउने खर्च, पानी, बिजुली र सञ्चार खर्च समेत जोडेर सम्बन्धित मतदान अधिकृतलाई एकमुष्ठ ५ हजार बुझाउने निर्वाचन आयोगले जनाएको छ ।
