काठमाडौँ । प्रहरी वृत्त थानकोटको नवनिर्मित कार्यालय भवनको आज विधिवत उट्घाटन गरिएको छ ।
नेपाल सरकारको कुल ६ करोड ७१ लाख ३४ हजार बजेटबाट निर्माण गरिएको प्रहरी वृत्त थानकोटको नवनिर्मित कार्यालय, ब्यारेक भवनको काठमाण्डौं उपत्यका प्रहरी कार्यालय रानीपोखरी, काठमाडौंका प्रमुख, प्रहरी अतिरिक्त महानिरीक्षक टेक बहादुर तामाङ्गले उट्घाटन गरेका हुन् ।
विगत ५ वर्षदेखि प्रहरी भवन निर्माण चरणमा रहेकोले थानकोट प्रहरी वृत्तको दैनिक प्रशासनिक कार्य त्रिभुवन पार्कको स्वामित्वमा रहेको भवन तथा थानकोटका निजि घरहरू भाडामा लिएर सञ्चालन हुँदै आएकोमा अबदेखि आफ्नै भवनबाट थप सेवा सुविधासहित कार्यालय सञ्चालन हुने थानकोट वृत्त प्रमुख एलिजा गिरीले जानकारी दिएकी छिन् ।
विभिन्न तहका प्रहरी प्रशासनका व्यक्तिहरू सहभागी रहेको उट्घाटन कार्यक्रममा चन्द्रागिरि नगरपालिकाका प्रमुख घनश्याम गिरीका साथै उपप्रमुख बसन्ती श्रेष्ठ लगायत जनप्रतिनिधिहरूको समेत उपस्थिति रहेको थियो ।
