काठमाडौँ । ॐ समाज डेण्टल हस्पिटलले आफ्नो पाँचौँ शाखा ललितपुरको चापागाउँ दोबाटोमा स्थापना गरेको छ। राजधानीका चावेल, नैकाप, बनस्थली र महोत्तरीको बर्दिबासमा शाखा सञ्चालन गर्दै आएको यस अस्पतालले अब ललितपुरवासीलाई पनि नजिकैबाट गुणस्तरीय दन्त सेवा उपलब्ध गराउने भएको हो । उद्घाटन कार्यक्रममा समाजसेवी, बुद्धिजीवी, कलाकार र पत्रकारलाई सम्मान गरिएको थियो भने सोही अवसरमा निःशुल्क दन्त स्वास्थ्य परीक्षणसमेत गरिएको थियो ।
अस्पतालका डा. सुवास घिमिरेले कार्यक्रममा सम्बोधन गर्दै अस्पताल खोल्नुको मुख्य उद्देश्य डाक्टर भएर मात्र होइन समाजलाई बदल्ने सोचका साथ सेवा दिने रहेको बताए । उनका अनुसार अस्पताल भनेको केवल उपचार गर्ने स्थान मात्र नभई विचार, सोच र जीवनशैलीलाई सुधार गर्ने केन्द्र हुनुपर्छ । उनले भने, “मान्छेमा कथा बनाउने र बाँच्ने कला हुन्छ। ती कथाले जीवनलाई दिशा दिन्छन् । हामीले अस्पताल खोलेको कारण डाक्टर हुनु मात्र होइन विचारमार्फत समाज परिवर्तन गर्ने लक्ष्य हो ।”
यस उद्घाटन समारोहमा २० जना पत्रकार र ५ जना सामाजिक अभियानतालाई विशेष सम्मान प्रदान गरिएको थियो । समारोहमा सम्मानितहरूले स्वास्थ्य सेवा प्रवर्धन र समाजका लागि पुर्याएको योगदानको प्रशंसा गर्दै, उनीहरूको भूमिका र मेहनतको कदर गरिएको अस्पताल प्रशासनले जनाएको छ ।
कार्यक्रमको सम्पूर्ण व्यवस्थापन सामाजिक अभियन्ता तथा पत्रकार राजन थापाले गरेका थिए ।
