काठमाडौँ । राष्ट्रिय स्वतन्त्र पार्टी चन्द्रागिरि नगर समितिको विशेष बैठक सम्पन्न गरिएको छ ।
वैशाख १६ गते सम्पन्न विशेष बैठकले आगामी स्थानीय निर्वाचनका लागि उम्मेदवार छनोटको मापदण्ड र छनौट विधि, सिफारिस, वडा तहसम्म संगठन सुदृढीकरण र आगामी नगर अधिवेशनको तयारी गर्ने जस्ता महत्वपूर्ण निर्णयहरू गरेको थियो ।
बैठकले गरेका मुख्य निर्णयहरूमा उम्मेदवार छनौट विधि र मापदण्डका विषयमा शैक्षिक योग्यता, राजनीतिक सक्रियता, सामाजिक क्रियाकलाप, अनुभव, चरित्र, स्वास्थ्य अवस्था, कार्ययोजना, वक्तृत्व क्षमता र निष्पक्ष र निष्कलंक छविलाई आधार बनाईने निर्णय गरेको छ ।
त्यस्तै, नगर कार्यसम्पादन टोली गठन प्रक्रियाका सम्बन्धमा नगर संगठनलाई थप सुदृढ बनाउँदै जनतासँग प्रत्यक्ष समन्वय गर्न टोली गठन प्रक्रिया अगाडि बढाउने निर्णय गरेको छ भने वडा-वडा बाट सदस्यहरूको सहभागितामा समाधान संयन्त्रलाई सक्रिय बनाउने तथा नगर अधिवेशनको तयारीलाई तीव्रता दिने समेत बैठकले निर्णय गरेको छ ।
