काठमाडौं । बिपी राजमार्गको चौंकीडाँडादेखि बर्खेखोलासम्मको १६ स्थानमा गरी ४ किलोमिटर ८ मिटर खण्ड बाढी र पहिरोले जगदेखि डाइभर्सन वगाएको छ । यसमध्ये १४ स्थान भक्तपुर–काभ्रेप्लाञ्चोक डिभिजन कार्यालयअन्तर्गत परेका छन भने २ स्थान सिन्धुली–रामेछाप (खाल्टे) डिभिजन कार्यालय अन्तर्गत पर्छ ।
सरकारले उक्त बाटो पुनः सुचारु गर्न तत्कालै आवश्यक तयारी गर्न आइतबार सडक विभागलाई निर्देशन दिएको थियो ।
भौतिक पूर्वाधार तथा यातायात मन्त्री कुलमान घिसिङले एक साताभित्र उक्त सडक सञ्चालनमा ल्याउन विभागका उच्च अधिकारीलाई निर्देशन दिएका छन् ।
निर्देशन अनुसार अहिले रोशी खोलाको किनारै किनार हुने गरी बगरमा लिक बनाउने काम सोमबारदेखि सुरु भएको छ ।
गत वर्ष दशैंमा आएको बाढी पहिरोले १ सय ६० किलोमिटर दूरी भएको धुलिखेल–बर्दिबास बिपी राजमार्गको २८ किलोमिटर खण्ड पूर्ण रुपमा बगेको थियो ।
