काठमाडौं । नेपाली राजनीतिका शिखर पुरुष, पूर्वप्रधानमन्त्री एवं नेपाली कांग्रेसका पूर्वसभापति गिरिजाप्रसाद कोइरालाको १६ औँ स्मृति दिवस आज मुलुकभर विविध कार्यक्रमका साथ मनाइँदैछ ।
नेपालमा एक दशक लामो सशस्त्र माओवादी विद्रोहलाई शान्तिपूर्ण अवतरण गराई मुलुकलाई संघीय लोकतान्त्रिक गणतन्त्रको मार्गमा डोर्याउन कोइरालाले अभिभावकीय भूमिका निर्वाह गरेका थिए । उनको योगदानलाई नेपाली राजनीतिमा विशेष महत्त्वका साथ स्मरण गरिन्छ ।
कांग्रेसका संस्थापक एवं जननायक बिपी कोइरालाको ६ दशक लामो संविधानसभा निर्वाचन गर्ने सपना गिरिजाप्रसादकै नेतृत्वमा २०६४ चैत २८ गते साकार भएको थियो । पहिलो संविधानसभा निर्वाचनमार्फत सशस्त्र द्वन्द्वमा रहेको तत्कालीन नेकपा (माओवादी) लाई संसदीय राजनीतिको मूलधारमा ल्याउन कोइराला सफल भएका थिए ।
गिरिजाप्रसाद कोइरालाले मुलुकमा शान्ति स्थापना र लोकतन्त्र सुदृढीकरणका लागि पुर्याएको अविस्मरणीय योगदानको कदर गर्दै आज नेपाली कांग्रेस, यसका भ्रातृ संगठन र शुभेच्छुक संस्थाहरूले देशैभर विचार गोष्ठी, दीप प्रज्वलन तथा फलफूल वितरण लगायतका कार्यक्रम आयोजना गर्दैछन् ।
कोइरालाको २०६६ साल चैत ७ गते निमोनियाँका कारण निधन भएको थियो ।
