काठमाडौं । चन्द्रागिरि कला समूहको आयोजना तथा वडा नं ७ को सहकार्यमा विभिन्न क्षेत्रमा योगदान दिएका व्यक्तित्वहरूलाई सम्मान गरिएको छ ।
चन्द्रागिरि नगरपालिकाको वडा नं ७ मा रहेर कला, साहित्य, संस्कृति, सञ्चार, खेलकूद, कलाकारिता तथा समाज सेवाको क्षेत्रमा उल्लेखनीय योगदान पुर्याएका ५१ जना व्यक्तित्वहरूलाई सम्मान गरेको हो ।
प्रमुख अतिथि घनश्याम गिरीको उपस्थितिमा वडा नं ७ अन्तर्गत रहेर योगदान पुर्याएका ६ जना सञ्चारकर्मी, ११ जना कलाकार तथा चलचित्रकर्मी, ९ जना संगीतकर्मी, १५ जना समाजसेवी, ९ जना खेलाडीहरूलाई उनीहरूको योगदानको कदर गर्दै सम्मान गरिएको वडा नं ७ का वडा सदस्य भुवन केसीले बताएका छन् ।
चैत्र १४ गते शनिबार ग्रीन्ल्याण्ड ब्यान्क्वेटमा भएको उक्त कार्यक्रमको अध्यक्षता चन्द्रागिरि कला समूहका अध्यक्ष श्याम कृष्ण मानन्धरले गरेका थिए भने वडा नं ७ का वडा सदस्य एवंम नगरकार्यपालिका सदस्य उमा कुमारी थापाले संयोजकको भूमिका निर्वाह गरेकी थिइन् ।
वडा नं ७ मा रहेर विभिन्न विधा, क्षेत्रमा योगदान पुर्याएका व्यक्तित्वहरूलाई सम्मान गरिएको कार्यक्रमका प्रमुख अतिथि घनश्याम गिरीले सम्मानित व्यक्तिहरू चन्द्रागिरि नगरपालिकाको सम्पत्ति भएको तथा उनिहरूको योगदान र भूमिका चन्द्रागिरि नगरको इतिहास, संस्कृति, सभ्यता विकासका लागि अतुलनीय रहेको बताएका थिए ।
आज सम्पन्न सम्मान कार्यक्रममा विगत लामो समयदेखि नेपाली पत्रकारितामा योगदान दिएका शोणितपुरकर्मी देवेन्द्र महतलाई पनि उनले सञ्चार क्षेत्रमा पुर्याएको योगदानको कदर गर्दै सम्मान गरिएको छ ।
