काठमाडौं महानगरपालिकाले रात्रिकालीन सार्वजनिक यातायात सेवा सञ्चालन गर्ने भएको छ ।
साझा यातायातसँगको सहकार्यमा नयाँ वर्ष २०८३ वैशाख १ गतेबाट सुरु गरिने यो सेवा प्रारम्भिक चरणमा ४ वटा विद्युतीय बसमार्फत सञ्चालन गरिने भएको हो ।
महानगरले लगनखेल–बुढानीलकण्ठ र थानकोट–अन्तर्राष्ट्रिय विमानस्थल गरी दुई प्रमुख करिडोरमा बस सञ्चालन गर्ने योजना बनाएको छ । लगनखेल, पाटन अस्पताल, अल्का, नर्भिक, प्रसुति गृह, ट्रमा सेन्टर, वीर अस्पताल, कान्ति, टिचिङ् र गंगालाल हुँदै बुढानीलकण्ठसम्मको करिब १६ किलोमिटर रुट तय गरिएको छ ।
त्यस्तै, थानकोटदेखि सतुंगल, कलंकी, कालीमाटी, त्रिपुरेश्वर, थापाथली, माइतीघर, बानेश्वर, तीनकुने हुँदै विमानस्थलसम्म करिब २० किलोमिटर रुट निर्धारण गरेको छ ।
रात्रीकालिन यातायात सेवा साँझ ८ बजेदेखि राति ११ बजेसम्म सञ्चालन गरिनेछ भने प्रत्येक २० मिनेटमा बस उपलब्ध हुनेछ । यात्रुको सुरक्षालाई ध्यानमा राख्दै सबै बसमा सीसी क्यामरा जडान गरिने र नगर प्रहरीसमेत खटाइने बताइएको छ ।
