काठमाडौं । प्रधानमन्त्री केपी शर्मा ओलीले पेरिस पाराओलम्पिक खेलमा नेपाललाई कांस्य पदक दिलाउन सफल नेपाली खेलाडी पलेशा गोवर्धनलाई बधाई दिनुभएको छ ।
ओलीले सामाजिक सञ्जाल फेसबुक मार्फत पलेशालाई बधाई दिनुभएको हो । ‘पेरिस पाराओलम्पिकमा नेपालले कांस्य पदक प्राप्त गरेको छ, पदक दिलाउन सफल तेक्वान्दो खेलाडी पलेशा गोवर्धनलाई बधाई’, ओलीले लेख्नु भएको छ ।
फ्रान्सको पेरिसमा जारी पेरिस पाराओलम्पिकमा पलेशाले शुक्रबार राति के ४४ क्याटागोरी अन्तर्गत महिला ५७ केजीमुनि तौलमा सर्बियाकी मारिया मिसेभलाई १५–८ ले हराउँदै कांस्य जित्नु भएको हो ।
कांस्य पदक जित्दै पलेशा नेपालको लागि ओलम्पिक्स र पाराओलम्पिक्समा पदक जित्ने पहिलो नेपाली खेलाडी बन्न सफल हुनुभएको छ । नेपाली खेलकुदको इतिहासमा ओलम्पिकमा पदक जित्ने पहिलो खेलाडी बन्दै उहाँले राष्ट्रिय कीर्तिमान बनाउनुभएको छ ।
पलेशा शुक्रबार भएको पहिलो खेलमा भेनेजुएलाकी मोरालेसलाई ३१–९ को फराकिलो अन्तरले पराजित गर्दै क्वाटरफाइनलमा छिर्नु भएको थियो । क्वाटरफइनलमा पलेशा ब्राजिलियन खेलाडी सिल्भाना मायारा पर्नान्डेजसँग १०–८ ले पराजित हुनुभएको थियो ।