काठमाडाैं । नेपालभाषाका व्याकरणविद् एवं भाषासेवी विष्णु चित्रकार हामी माझ रहेनन् ।
जगतसुन्दर ब्वनेकुथिका संस्थापक एवं संचालन समितिका उपाध्यक्ष साथै नेवाः आन्दोलनका अग्रणी व्यक्तित्व चित्रकारको हृदयघातका कारण मृत्यु भएको बताइएको छ । मुक्तिनाथ दर्शन गर्न मुस्ताङ गएका उनलाई हिजो विहान करिब ३ बजेतिर हृदयघात भएपछि मुक्तिनाथ अस्पताल लगिएको थियो ।
७६ वर्षिया चित्रकारको पार्थिव शरीरलाई आज विहान ८ देखि १० बजे सम्म जगत सुन्दर ब्वनेकुथिमा आन्तिम श्रद्धाञ्जलीको लागि राखिने भएको छ ।
दिवंगत चित्रकारले स्वर्गीय देवदास मानन्धरसँग मिलेर नेपाल संवत्यम नगुमा प्रकाशनमा सक्रिय रुपमा लागेका थिए भने उनले नेपाल लिपि युनिकोड दतार्मा सक्रिय भूमिका निभाएका थिए । नेपालभाषा साहित्यमा कथा र कवितामा कलम चलाएतापनि चित्रकारको मूलधार भने व्यकरणविद् नै हो । उनले नेपालभाषा व्याकरण सम्बन्धी थुप्रै पुस्तक लेखेका छन् ।
वि.सं.२०२० सालदेखि नेपालभाषा आन्दोलनमा सक्रिय रहेका चित्रकार २०२२ सालभा भएको नेपालभाषाल आन्दोलनमा पनि सक्रिय भूमिका निभाएका थियो । स्वर्गीय चित्रकारको परिवारमा एक छोरी र श्रीमती छन् ।
