कीर्तिपुर, धरान उपमहानगरपालिकाका मेयर हर्क साम्पाङले कीर्तिपुरको भ्रमण गरेका छन् । मेयर हार्क साम्पाङको प्रतिनिधिमण्डल बुधबार बिहान कीर्तिपुर आइपुगेको हो ।
कीर्तिपुर आएका मेयर हर्कले कीर्तिपुरको इतिहास, धार्मिक सम्पदा अजुदय बाघभैरव, लायकु दरबार क्षेत्र, क्वाच्व उमामहेश्वर मन्दिर र नेवा लहानको अवलोकन गरेका थिए ।
भ्रमणका क्रममा उनले सरसफाई कार्यक्रममा समेत सहभागिता जनाएका थिए । उनले मंसिर १६ मा हुने उपनिर्वाचनमा कीर्तिपुरमा मेयर पदमा स्वघोषित उम्मेदवार रहेका राजमान मानवलाई पनि बधाई दिए ।
हर्क साम्पाङ कीर्तिपुरमा आएको थाहा पाएपछि स्थानीय समुदायका धेरै मानिस मेयर हर्कलाई भेट्न आएका थिए । नेवा एफएमका सञ्चारकर्मी वीरेन्द्र शाक्य ‘विविशा’ले मेयर साम्पाङलाई कीर्तिपुरको इतिहास, संस्कृति र सम्पदाबारे जानकारी गराए ।
भ्रमणपछि बोल्दै उनले भने, “मैले कीर्तिपुरको बारेमा जे पढेको र सुनेको छु त्यो आफ्नै आँखाले हेर्न पाउँदा निकै रमाइलो र राम्रो लागेको छ । भ्रमणका क्रममा उनले पूर्व मेयर रमेश महर्जन, पूर्व वडा अध्यक्ष हर्ष महर्जनलगायत स्थानीयवासीसँग भेटघाट गरेका थिए ।
तस्बिरः प्रदीप महर्जन
