अन्तर्राष्ट्रिय महिला च्याम्पियनसिप फुटबल आजदेखि त्रिपुरेश्वरस्थित दशरथ रंगशालामा सुरु हुँदै छ ।
सोमबारदेखि सुरु हुन लागेको अन्तर्राष्ट्रिय महिला च्याम्पियनसिपमा नेपालले आफ्नो पहिलो खेलमा कीर्गिस्तानसँग प्रतिस्पर्धा गर्न लागेको छ । खेल साँझ ६ बजे त्रिपुरेश्वरस्थित दशरथ रंगशालामा हुनेछ । सन् २०१९ पछि नेपालले कीर्गिस्तानसँग पहिलोपटक खेल्न लागेको हो ।
नेपालले कीर्गिस्तानविरूद्ध सन् २०१९ मा कीर्गिस्तानमा भएको नाजेज्दा कपमा प्रतिस्पर्धा गरेको थियो । उक्त खेलमा नेपालले कीर्गिस्तानलाई घरेलु मैदानमै ८-२ गोलअन्तरले हराएको थियो ।
एएफसी एसियन कप र फिफा महिला विश्वकपको तयारी स्वरूप एन्फाले चार देशीय च्याम्पियनसिपको आयोजना गरेको हो । चार देशीय च्याम्पियनसिपमा नेपालसँगै म्यानमार, कीर्गिस्तान र लेबनान सहभागी छन् ।
उद्घाटन खेल भने दिउँसो २ बजे सुरु हुनेछ । उद्घाटन खेलमा लेबनान र म्यानमार आमनेसामने हुनेछन् । नेपालले ८ फागुनमा लेबनान र ११ फागुनमा म्यानमारसँग प्रतिस्पर्धा गर्नेछ । राउण्ड रोबिनका आधारमा हुने प्रतियोगिताका शीर्ष दुई टिमले फाइनल खेल्नेछन् ।
