काठमाडौं । सरकारी सेवालाई नागरिकको पहुँचमा सहज बनाउने उद्देश्यले विकास गरिएको नागरिक एपमा थुप्रै नयाँ फिचर थपिएका छन् । सूचना प्रविधि विभागले हालै राजधानीमा एक कार्यक्रम आयोजना गरी एपमा थपिएका नयाँ विशेषता सार्वजनिक गरेको हो ।
विभागका नागरिक एप रिसर्च एन्ड डेभलपमेन्ट प्रोजेक्ट मेनेजर सन्तोष अर्यालले एपमा राष्ट्रिय परिचयपत्र प्रमाणीकरण, लोकसेवा आयोग सेवाको इन्टिग्रेसन, सुरक्षित पहिचानका लागि नागरिक पहिचान द्वारको स्तरोन्नति, आर्टिफिसियल इन्टेलिजेन्स (एआई)मा आधारित फोटो प्रमाणीकरण जस्ता सेवा थपिएको बताए । उनका अनुसार अहिले नागरिक एपमा भेरिफिकेसनका लागि आउने सबै फोटो एआईले नै विश्लेषण गर्छ । फोटो माग गरे अनुसारको नभएमा एआईले नै रद्द गर्छ ।
त्यस्तै नागरिक एपको वेब पोर्टललाई पनि एप जस्तै काम गर्न सक्ने बनाइएको अर्यालले जानकारी दिए । खासगरी अकाउन्ट सिङ्क हुने, इन्टरफेस मिल्ने र मोबाइल एप जस्तै काम गर्नेगरी वेब पोर्टलको स्तरोन्नती गरिएको हो ।
त्यसैगरी बागमती प्रदेश अन्तर्गतका सबै सचारी चालक अनुमति पत्रका लागि नयाँ दर्ता र नवीकरणको सुविधा मिलाइएको उनले सुनाए । विभागले नागरिक एपलाई थप सहज र उपयोगी बनाउन निरन्तर प्रयासरत रहेको र आगामी दिनमा यस एपले नागरिकलाई सरकारी सेवा प्राप्त गर्न अझ बढी सहजता प्रदान गर्ने विश्वास लिएको छ ।
