काठमाडौं । सामाजिक सञ्जाल नियमनको सरकारी अभियानले तीव्रता पाउँदै जाँदा, फेसबुक, इन्स्टाग्राम र व्हाट्सएप सञ्चालक मेटा प्लेटफर्मले अन्ततः आफ्ना प्रतिनिधि नेपाल पठाएको छ।
सञ्चार तथा सूचना प्रविधि मन्त्रालयले वैशाख ३ गते (अप्रिल १५) सम्म नेपालमा दर्ता नभएका सामाजिक सञ्जालहरूलाई नेपालभित्र सञ्चालन नहुने चेतावनी दिएपछि मेटा सिंगापुरस्थित क्षेत्रीय कार्यालयबाट उच्च अधिकारीहरूलाई छलफलका लागि काठमाडौँ पठाएको हो।
मेटाका सार्वजनिक नीति प्रबन्धक तथा एसिया–प्रशान्त सम्पर्क अधिकृत रुजान सरवारले बिहीबार संचारमन्त्री पृथ्वी सुब्बा गुरुङसँग भेट गर्ने कार्यक्रम तय भएको छ । हालसम्म टिकटक, भाइबर र विच्याट मात्र नेपालमा औपचारिक रूपमा दर्ता भइसकेका छन्। सर्वाधिक प्रयोगमा रहेका फेसबुक र मेसेन्जर भने अझैसम्म दर्ता प्रक्रिया बाहिर छन्।
गत नोभेम्बरदेखि लागु भएको ‘सामाजिक सञ्जाल प्रयोगको नियमनसम्बन्धी निर्देशन, २०२३’ अन्तर्गत सबै कम्पनीहरूलाई नेपालमा दर्ता हुन, सम्पर्क व्यक्ति तोक्न, गुनासो समाधान अधिकारी राख्न र स्वनियमनका लागि निरीक्षण अधिकारी तोक्नुपर्ने व्यवस्था छ। सरकारले निर्देशन पालना नगर्ने प्लेटफर्मलाई देशभित्र सञ्चालन गर्न नदिने स्पष्ट सन्देश दिँदै आएको छ।
मेटाको सक्रियता यस अभियानमा टर्निङ प्वाइन्ट सावित हुन सक्छ।
