काठमाडौं । नेपाल राष्ट्र बैंकले आगामी आर्थिक वर्षका लागि बहुप्रतिक्षित मौद्रिक नीति आज सार्वजनिक गर्दैछ । गभर्नर डा. विश्वनाथ पौडेलले दिउँसो १:३० बजे बालुवाटारस्थित राष्ट्र बैंकको नयाँ भवनबाट आफ्नो पहिलो मौद्रिक नीति सार्वजनिक गर्ने तय भएको हो ।
‘उदार तथा विवेकशील नियमन’ को अवधारणालाई आत्मसाथ गर्दै बजारलाई चलायमान बनाउन केन्द्रित हुने यो मौद्रिक नीतिले एक दशकभन्दा लामो समयदेखि रोकिएको वाणिज्य बैंकको नयाँ लाइसेन्स खुला गर्नेदेखि विवादास्पद चालु पुँजी कर्जा मार्गदर्शनको व्यापक संशोधनसम्मका महत्वपूर्ण घोषणाहरू गर्ने तयारी छ ।
मौद्रिक नीतिको सबैभन्दा उल्लेखनीय पक्षमध्ये एक, २०६७ सालदेखि बन्द रहेको वाणिज्य बैंकको नयाँ लाइसेन्स विभिन्न सर्तसहित खुला गरिनेछ । यसका साथै, विदेशी संयुक्त लगानीका बैंकहरूलाई हालको थोक बैंकिङबाट खुद्रा (रिटेल) बैंकिङमा समेत प्रवेश खुला गरिने भएको छ, जसका लागि चिनियाँ बैंकहरूले एक दशकदेखि प्रयास गर्दै आएका थिए ।
