काठमाडौँ । चन्द्रागिरि नगरपालिकाले नगरभित्र संचालनमा रहेका सबै सहकारी संस्थाहरूलाई समयमै लेखापरीक्षण तथा साधारण सभा गर्न आव्हान गरेको छ ।
सहकारी ऐन, २०७४ को दफा ७५ को उपदफा १ र चन्द्रागिरि नगरपालिकाको सहकारी ऐन, २०७५ को दफा ५४ को उपदफा १ को प्रावधान अनुरूप सहकारी संस्थाहरुले प्रत्येक आर्थिक वर्षको लेखापरीक्षण सो आर्थिक वर्ष समाप्त भएको मितिले ३ (तीन) महिना भित्र प्रचलित कानून बमोजिम इजाजत प्राप्त लेखापरीक्षकद्वारा गराउनु पर्ने कानूनी व्यवस्था रहेकोले चन्द्रागिरि नगरपालिकाको नियमन क्षेत्रभित्र पर्ने सम्पूर्ण सहकारी संस्थाहरूलाई सोहि बमोजिम लेखापरीक्षण गराई तोकिएको समयभित्र प्रतिवेदन पेश गर्न भनिएको छ ।
त्यस्तै, सहकारी ऐन, २०७४ को दफा ३९ को उपदफा २ र चन्द्रागिरि नगरपालिकाको सहकारी ऐन, २०७५ को दफा २८ को उपदफा २ बमोजिम सहकारी संस्थाका संचालक समितिले प्रत्येक आर्थिक वर्ष समाप्त भएको मितिले ६ (छ) महिनाभित्र वार्षिक साधारण सभा बोलाउनु पर्ने कानूनी व्यवस्था रहेकोले चन्द्रागिरि नगरपालिकाको नियमन क्षेत्रभित्र पर्ने सम्पूर्ण सहकारी संस्थाहरूले सोहि बमोजिम आफ्नो संस्थाको वार्षिक साधारण सभा सम्पन्न गरि तोकिएको समयभित्र चन्द्रागिरि नगर कार्यालयमा प्रतिवेदन पेश गर्न भनिएको छ ।
साथै, तोकिएको समयभित्र प्रतिवेदन पेश नगरेमा चन्द्रागिरि नगरपालिकाको आर्थिक ऐन, २०८२ को अनुसूची ११ को (ख) बमोजिम जरिवाना गरिने बताइएको छ ।
