काठमाडौं । नेपालमा पनि अबदेखि फेसबुकले मनिटाइजेसनको सुविधा दिएको छ ।
फेसबूकले मनिटाइजेसनको सुविधा उपलब्ध गराएपछि अहिले नेपालमा फेसबुक मनिटाइज गर्ने ट्रेन्ड नै चलेको छ भने अधिकांशले कसरी मनिटाइज गर्ने भन्दै चासो व्यक्त गरिरहेको पनि देख्न सकिन्छ । कतिपयले त आफुहरूले आम्दानी समेत गर्न थालेको भन्दै सामाजिक संजालमा भटाभट पोस्ट राखिरहेका छन् ।
उसो त विश्वका धेरैजसो देशलाई मनिटाइजेसनका लागि योग्य देशको सूचीमा सुरुमै समेटेको फेसबुकले एशियाका नेपाल, माल्दिभ्स, भुटान, पाकिस्तान, बंगलादेश, थाइल्यान्ड, अफगानिस्तानलाई भने समेटेको थिएन । यद्यपि, गत सोमबारबाट भने फेसबुकले नेपाललाई पनि फेसबुक मनिटाइजेसन एलिजीबल कन्ट्रिको सूचीमा राखेको छ ।
यसका लागि फेसबुकको मनिटाइजेसन प्रोग्रामको सामेल हुन केही मापदण्ड बनाएको छ । जसका लागि तपाईंको प्रोफाईल वा पेजमा कम्तीमा ५ हजार फलोअर्स पुगेको हुनुपर्छ । साथै, ती प्रोफाईल वा पेजमा अपलोड भएका भिडियोहरूमा पछिल्लो ६० दिनभित्र ६० हजार मिनेट वाच टाइम पुगेको हुनुपर्छ ।
अर्थात् तपाईंले अपलोड गरेका भिडियोहरूमा आएको भ्यूजमा कतिले कति बेर हेरेका छन् भन्ने कुराले अर्थ राख्छ ।
भ्यूज भन्दा पनि कति मिनेट हेरियो भन्ने वाच टाईमलाई फेसबुकले गणना गर्छ । मुख्यतया यी दुई कुरा पूरा भएपछि फेसबुकले तपाईंलाई मनिटाइजेसनका लागि आमन्त्रण गर्छ ।
महत्वपूर्ण कुरा के पनि हो भने, यदि तपाईंले पहिल्यै आफ्नो प्रोफाईल वा पेजमा यौन, हिंसा, अपराधजन्य फेसबुकको कम्युनिटी गाईडलाईन्स विपरीतका सामग्री पोस्ट गर्नुभएको छ भने पनि मनिटाइज हुँदैन । यस्तो अवस्थामा ५ हजार फलोअर्स वा सो भन्दा बढी र वाच टाईम पुगेको छ भने पनि त्यसको अर्थ हुँदैन ।
आफ्नो पेज वा प्रोफाइलमा कुनै समस्या भए नभएको हेर्न प्रोफाइल स्टाटसमा गएर जाँच गर्न सकिन्छ । मनिटाइजेसन भएपछि पनि फेसबुकको कम्युनिटी गाईडलाईन्स विपरीतका सामग्री पोस्ट गर्नुभयो भने मनिटाइजेसन गुम्न सक्छ र भएको आम्दानी समेत रोकिन सक्छ ।
कसरी गर्ने त मनिटाइजेसन ?
मनिटाइजेसनका लागि फेसबुकको ‘पार्टनर मनिटाइजेसन पोलिसीरकन्टेन्ट मनिटाइजेसन पोलिसी’को पालना गर्नुपर्छ । मौलिक, विश्वसनीय कन्टेन्ट उत्पादन गर्ने, कम्युनिटी गाईड्लाईन्स विपरीतका गतिविधि नगर्नेजस्ता नैतिक आचरणको पालना गर्नुपर्छ ।
मनिटाइजेसनका लागि योग्य फेसबुक अकाउन्ट र पेजलाई फेसबुकको सिस्टमले स्वत: सूचना पठाउँछ ।
तपाईं आफ्नो प्रोफाईललाई पेजमा रुपान्तरण गरेर पनि फेसबुकको मनिटाइजेसन प्रोग्राममा सामेल हुन सक्नु हुन्छ ।
प्रोफाइलमा प्रोफेसनल मोड एक्टिभेट गर्नुभएको छैन भने आफ्नो प्रोफाईल खोलेर थ्री डट आईकनमा क्लीक गरी प्रोफेसनल मोड अन गर्न सकिन्छ ।
त्यसपछि कन्टेन्ट मनिटाइजेसन ट्याबमा गएर प्रक्रिया पूरा गर्नु पर्ने हुन्छ ।
फेसबुक पेजको हकमा पनि प्रक्रिया पूरा गर्न प्रोफेसनल ड्यासबोर्डमा गएर मनिटाइजेसन सेक्सनमा जान सकिन्छ । अथवा फेसबुककै मेटा बिजनेसमा गएर मनिटाइजेसन सेक्सनमा जान सकिन्छ । मनिटाइजेसन सेक्सनमा तपाईं पेज योग्य छ वा छैन समेत देखिन्छ ।
योग्य भए एलिजिबिलिटीमा क्लीक गरी त्यहाँ भने अनुसार गर्नुपर्छ । अप्लाई गर्दा नै फेसबुकले बैंक अकाउन्ट लगायतका विवरण माग्छ त्यो भरेर सेटअप गर्न सकिन्छ ।
नेपाली क्रिएटर्सले आफ्नो कमाई सिधै स्थानीय बैंक खातामा प्राप्त गर्न सक्छन् । तपाईंले मनिटाइजेसन सेटअप गर्दा ‘नेपाल’ छनोट गरी आफ्नो बैंक विवरण भर्नुपर्छ ।
