काठमाडाैं। नेपालमै पहिलोपटक क्यान्सर उपचारमा प्रयोग हुने औषधिको कच्चा पदार्थ उत्पादन सुरु भएको छ । चितवनस्थित जायोडिन बायोटेक उद्योग ले क्यान्सरको औषधि निर्माणमा आवश्यक पर्ने कच्चा पदार्थ (एपीआई–एक्टिभ फार्मास्युटिकल इन्ग्रेडियन्ट) उत्पादन सुरु गरेको जनाएको छ ।
उद्योगका अनुसार क्यान्सर रोग उपचारका लागि प्रयोग हुने औषधिको आधारभूत कच्चा पदार्थ हालसम्म अधिकांश विदेशबाट आयात हुँदै आएको अवस्थामा अब नेपालमै उत्पादन थालिएको हो । यस कदमले स्वदेशी औषधि उद्योगलाई बल पुग्नुका साथै आयातमा निर्भरता कम हुने अपेक्षा गरिएको छ ।
उद्योगले आधुनिक प्रविधिको प्रयोगमार्फत अन्तर्राष्ट्रिय मापदण्डअनुसार उत्पादन प्रक्रिया अघि बढाएको जनाएको छ । उत्पादन सुरु भएसँगै नेपालमा भविष्यमा क्यान्सरविरुद्धका औषधि स्वदेशमै उत्पादन तथा विस्तार गर्न आधार तयार हुने विश्वास व्यक्त गरिएको छ ।
स्वास्थ्य क्षेत्रका जानकारहरूका अनुसार नेपालमा क्यान्सर रोगीको संख्या वर्षेनी बढ्दो क्रममा रहेकाले उपचारमा प्रयोग हुने औषधि तथा आवश्यक सामग्रीको सहज उपलब्धता महत्त्वपूर्ण विषय बनेको छ । स्वदेशमै कच्चा पदार्थ उत्पादन हुन थालेपछि दीर्घकालीन रूपमा औषधिको लागत घटाउन र उपलब्धता सहज बनाउन सहयोग पुग्न सक्ने अपेक्षा गरिएको छ ।
उद्योगले प्रारम्भिक चरणमा सीमित परिमाणमा उत्पादन सुरु गरेको र आगामी दिनमा उत्पादन क्षमता विस्तार गर्ने योजना रहेको जनाएको छ । सम्बन्धित निकायबाट आवश्यक गुणस्तर परीक्षण तथा स्वीकृति प्रक्रियासमेत अगाडि बढाइएको बताइएको छ ।
नेपालमा औषधि उत्पादन क्षेत्रमा यो पहललाई महत्त्वपूर्ण उपलब्धिका रूपमा हेरिएको छ । स्वदेशी प्रविधि, लगानी र उत्पादन क्षमताको विकाससँगै स्वास्थ्य क्षेत्रमा आत्मनिर्भरता बढाउने दिशामा यसले सकारात्मक सन्देश दिएको सरोकारवालाहरूको भनाइ छ ।
