काठमाडौँ। ब्राण्ड बिल्डिङ, ब्राण्ड पोजिसनिङ, मार्केटिङ, स्टोरीटेलिङसँगै क्रियटिभ दुनियाका व्यवसायिक व्यक्ति तथा जिज्ञासुहरु सहभागी ब्राण्ड्स एण्ड वियोण्ड २०२५ को सुरुवात भएको छ ।
ललितपुरस्थित झम्सिखेलमा रहेको द प्लाजामा सञ्चालित ब्राण्ड्स एण्ड वियोण्ड सेप्टेम्बर ४ र ५ अर्थात भाद्र १८ र १९ सम्म सञ्चालन हुनेछ । ब्राण्ड गफले दोस्रो संस्करणको रुपमा संचालन गरेको यो अन्तर्राष्ट्रिय कन्फ्रेन्स सन् २०२४ मा पहिलो पटक आयोजना गरिएको थियो ।
कार्यक्रममा ब्रान्डिङ र माकेर्टिङ क्षेत्रमा अन्तर्राष्ट्रिय स्तरमा ख्याति कमाएका वक्ताले प्रस्तुति दिनेछन् । जसमा दिल्लीका नरेश गुप्ताले द फ्युचर अफ् ब्रान्ड एण्ड कन्जुमर्स, मुम्बईका राजेश केभीले मुभमेन्टस् ओभर मिडियाः द फ्युचर अफ् मार्केटिङ इज फेल्ट, दुबईका सारा फोब्र्सले द कन्सेप्ट एण्ड कपिः सुपर डुपर मार्केट, श्रीलंकाका सोहन धर्मराजाले मुभ फाष्ट, गेट डर्टी, स्टे अहेड, सिंगापुरका स्टेफन सेवार्जले द एशिएन एड्भान्टेजः लिडिङ मार्केटर्स नेक्ट रिभोलुशन र बंगलादेशका तफिक मुमदले न्यू भर्सेस न्यु शीर्षकमा आफ्नो अनुभव र विज्ञता प्रस्तुत गर्दैछन् । कार्यक्रमको उद्घाटन वक्ताहरुले सामुहिक रुपमा गरेका थिए भने ब्रान्ड गफका अध्यक्ष निश्चल कट्टेलले सहभागि तथा अतिथिहरुलाई स्वागत मन्तव्य मार्फत स्वागत गरेका थिए ।
यस कार्यक्रममा नेपालको विभिन्न ब्राण्ड क्रियटर्स, मार्केटर्स र यस क्षेत्रमा कृयाशील २ सय भन्दा बढी प्रोफेशनलहरुको सहभागिता रहेको छ । विभिन्न ८ विषयगत सेसनहरु संचालन हुने यस कार्यक्रममा ब्राण्ड र मार्केटिङ्गको क्षेत्रमा विश्वमा कहाँ के भैरहेको छ ? अहिलेको ट्रेण्ड के छ ? डिजिटल मिडिया र एआईसम्मको आजको युगमा अबको मार्केटिङ्ग बजार कस्तो हुनुपर्छ ? अवसर कस्ता छन् र चुनौतीहरु के छन् ? भन्ने जस्ता विषयहरुमा छलफल र मन्थन हुनेछ ।
यस कार्यक्रमले मार्केटिङ्गको पछिल्लो ट्रेण्ड र स्टाटेजी सँगसँगै केस स्टडीद्वारा सहभागिहरुको क्षमता विकास गर्ने विश्वास लिएको छ । ब्राण्ड र मार्केटिङ्ग क्षेत्रका दिग्गजदेखि यस क्षेत्रमा आउन चाहने नयाँ पुस्तालाई एकैठाउँमा राखेर उनिहरुको अनुभव सुन्दा यसले नेपाली मार्केटिङ क्षेत्रलाई पक्कै योगदान दिने अपेक्षा गरिएको छ ।
तस्बिर : प्रकाश गोपाली
