काठमाडौं । केन्द्रीय अनुसन्धान ब्युरोले जेन-जी आन्दोलनका क्रममा लुटिएका कुनैपनि सामान खरिद वा बिक्री गर्नेहरू विरुद्ध कडा कार्वाही गर्ने बताएको छ ।
ब्युरोले सार्वजनिक सूचना मार्फत यहि भाद्र २३ र २४ गते भएको प्रदर्शनको क्रममा सरकारी तथा निजी भवन, व्यापारिक भवन, बैंक बित्तीय संस्था लगायतका संरचनाहरुमा रहेका कागजपत्र, ऐतिहासिक दस्तावेज, बहुमुल्य बस्तु, हातहतियार, अन्य महत्वपूर्ण जिन्सी तथा नगद सामानहरु लुटपाट गरी विभिन्न माध्यमबाट बजारमा बिक्री बितरण भईरहेको पाइएको र त्यस विषयमा केन्द्रीय अनुसन्धान व्यूरो (CIB) बाट अनुसन्धान भईरहेको र त्यस्ता सरसामानहरूको खरिद तथा बिक्री नगर्न नगराउन अनुरोध गरेको हो ।
साथै, कुनै त्यस्ता लुटपाटका सामानहरू प्राप्त भएमा नजिकको सुरक्षा निकायमा खबर गर्न वा बुझाई दिन आग्रह गर्दै चोरी तथा लुटपाट भएका सामानहरूको खरिद बिक्री तथा सञ्चय गरेको पाइएमा प्रचलित कानून बमोजिम कारबाही गरिने समेत जनाएको छ ।
