काठमाडाैं । जेन-जी आन्दोलन, प्रदर्शनका क्रममा तोडफोड तथा आगजनी गरि क्षति पुर्याइएको चन्द्रागिरि हिल्सले प्रवर्द्धन गरिरहेको केबलकार तत्काल सञ्चालनमा नआउने भएको छ ।
हिल्सले दसैं अगाडि नै मर्मत, सम्भार तथा आवश्यक प्राविधिक प्रणाली सुधार गरि केबलकार सञ्चालन गर्न खोजेको भएपनि महत्त्वपूर्ण सामानहरू नआइपुगेकोले तत्काल केबलकार सञ्चालन नहुने भएको हो ।
नेपालकै दोस्रो र उपत्यकाको पहिलो केबलकारको रूपमा चिनिएको चन्द्रागिरि केबलकार अत्याधुनिक अस्ट्रियाली प्रविधि र जनशक्तिको नियमनमा सञ्चालन हुँदै आएकोमा हाल केबलकार सञ्चालनका लागि आवश्यक उपकरण तथा विशेषज्ञको टिम नआइपुगेको भएर समस्या उत्पन्न भएको हिल्सले जनाएको हो ।
दसैं अगाडि नै केबलकार सञ्चालन गर्नेगरि तीव्र रूपमा मर्मत कार्यमा जोड दिएको भएपनि समयमै आवश्यक सामान नआउँदा अझ एकदुई महिना केबलकार सञ्चालन गर्न ढिलाइ हुने बताइएको छ ।
भदौ २४ गतेको प्रदर्शनका क्रममा केबलकारको बटम स्टेसनमा ठूलो परिमाणमा क्षति पुगेको थियो भने केबलकार सञ्चालनका लागि आवश्यक प्राविधिक प्रणाली समेत ध्वस्त भएको थियो ।
