काठमाडौं उपत्यकाको चन्द्रागिरि नगरपालिका वडा नं १२ स्थित बलम्बुमा महाँलक्ष्मी अर्थात सिन्दुर जात्रा शुरू भएको छ । यो जात्रा कात्तिक पूर्णिमाको अघिल्लो दिनदेखि शुरू भई मार्ग कृष्णपक्षको प्रतिपदासम्म गरी तीन दिन मनाइन्छ ।
यसलाई न्हूँद नेपाल संवत् (नयाँ वर्ष) शुरू भएपछिको पहिलो जात्राको रूपमा लिइन्छ । स्थानीय भाषामा बलम्बुको जात्रालाई लाटिमर, त्यसको एक सातापछि थानकोटमा हुने जात्रालाई सकिमरः र एक महिनापछि सतुंगलमा हुने जात्रालाई बखुमरः (सातगाउँले जात्रा( भनिन्छ । जात्रा दुवा गुठीद्वारा सञ्चालन गरिन्छ । मूः (मुख्य (जात्रा र सिन्हः या जात्रा भनी सिन्दूर जात्रा गरिएको छ । सिन्हःया जात्रामा छोरीबेटी, आफन्त नातागोता पाहुना बोलाउने चलन छ ।
द्वारे घरबाट ऐतिहासिक खड्ग पीठमा ल्याई गरिने जात्रा र ढकीमा राखी कुमारीको मूर्तिको नगर परिक्रममा गराइने जात्राको अर्को विशेषता हो । जात्रा मनाउन कुमारी घर, महाँलक्ष्मी र गणेश मन्दिरबाट विधिवत् रूपमा पूजाआजा गरी देवता बाहिर ल्याउने गरिन्छ ।
जात्रामा महाँलक्ष्मी, गणेशलाई शिखर शैलीको छुट्टाछुट्टै रथमा राखेर सांस्कृतिक बाजागाजाको साथमा टोलटोलमा परिक्रमा गराउने प्रचलन रहिआएको छ ।
यसै अवसरमा चन्द्रागिरि नगरपालिका वडा नम्बर १२ को वडा कार्यालय कार्तिक १३ र १४ गते बन्द हुने भएको छ ।
